Ka noho toka tū moana te kaunihera Māori a Reipa ki a Shane Jones

  • Te Whanganui-ā-Tara

Kua tautoko pau te kaha te Kaunihera Māori o Te Rōpū Reipa i a Shane Jones, i te rōpū Kākāriki e tapa nei i a ia he whakaparahako i te wāhine, he koroheke hoki kua toka rawa tana tū ki te ao kōhatu. Inapō ko tā Jones ki a hongere tuatoru, kāore rawa ia mō te pupuri ringa ki ngā Kākāriki, ā, i te rā nei, i rere ngā wero whakahoki a Metiria Turei.

No tōna ra tuatahi i te whare pāremata i hikoi a Daniel Phillips i te taha o Shane Jones, inaianei ka hikoi ia ko tōna takitahi.

E ai ki a Phillips e mea nei, “Horekau he tangata i tua atu i a Shane Jones, me ōna āhuaranga katoa, ā, kua pōhara katoa mātou i tōna haere”

Engari mā te wehenga a Jones, ka whakahonohono anō te uepū Māori o Reipa. I tērā tau i noho totara wāhi rua rātou, ko ētahi ki Tīma Cunliffe, ko etahi ki a Tīma Jones.

I puta ngā kupu kohukohu i a Metiria Turei, e mea ana “He raru tino nui tōna kore ahei ki te rongo i ngā take nunui e pā ana ki ngā wāhine. Kāre i te pai mō tēnei rau tau, mō tāua te iwi Māori anō hoki rā.”

Inapo i puta ngā kōrero whakahē a Shane Jones ki te rōpū Kākāriki. Hēoi anō, tēra tonu tērā.

Engari ki tā te heamana o te Kaunihera Māori o Reipa, mā ngā mōrehu e kawe i te kaupapa a tō rātou rōpū inaianei.

Hei te Rāhoroi ka hui tahi te Kaunihera Māori o te rōpū Reipa, nga mema tōrangapū Māori hoki ki Ahuriri.