Ka mahara tonu a Tohu Harris i tōna karapu whutupaoro a Tamatea

Aroha Treacher
  • Te Tai Rāwhiti
  • Ahitereiria

He hītori mana nui tō te karapu whutupaoro o Tamatea, he kōtahi rau tau neke atu te tawhito, he karapu i whakatūria e ōna tūpuna.

E ai ki tōna taokete a Tāne Cooper, "Ko te tikanga a te karapu o Tamatea Arikinui, ehara i te toa takitahi he toa takitini kē."

Kei te whakairia tana poraka Kiwi e tana māmā e Dale Moffatt, ki ngā pakitara o te karapu i kaha poipoi i tana tama i āna whakatutukinga hākinakina.

"He whānau kōtahi tātou o Tamatea, i aia e tamariki ana i tākaro tahi ia ki āna kaihanga, āna tūngane otira i tākaro tahi ia me tōna pāpā."

Kei te pērā tonu ngā kōrero a tōna matua kēkē a Don Hutana,  "Ae, he momo tangata he rangatira e whakatinana I te mahi I tohea tana whanau takiaho mai a Tamatea Ariki nui kite ao nei."

Ahakoa he poumua a Harris mō tētahi o ngā karapu mana nui o te whakataetae NRL i ngā tau tekau kua horī, kāore anō ia kia wareware nō hea ia.

Nā runga i te mōhio ka tū māngai ia mo Tamatea he mea miharo rawa mō tātou, kei te mōhio tātou kei te whakapau kaha ia mō mātou, mō tōna whānau mōna anō hoki, Otira, ia wā i whakamaua e ia te poraka ka huri ōna whakaaro ki a tātou nō Tamatea."

E ono pūtu, e whā īnihi te taroaroa, he kotahi rau kirokaramu neke atu te taumaha, i pērā tonu ia, i aia i tōna tau tekau mā whā.

"I aia e tamariki ana i haria e mātou tōna tiwhikete whakawhānau ki ngā reehi, kia whakaatu atu ki ngā māmā, kia mōhio ai rātou, kei te tika tōna pakeketanga."

Kei te whakapeto ngoi tōna whānau hapū kia manaaki rātou i te tira hei ēnei rangi okioki i mua tonu i te tukinga tuatahi ki Ahuriri ki ngā Dragons.