Ka koke whakamua te papuni wai wenerau ki Ruataniwha

Aroha Treacher
  • Te Tai Rāwhiti

E matapaetia ana, ka koke whakamua te tono mō te hanganga o te papuni wai wenerau ki Ruataniwha. Kua whakaae te poari arotake i tēnei take ki ngā tono whakamahi rawa taiao, he tekau mā whitu te nui, i whakatakotoria mō te kaupapa nei.

Heoi me ū te kaunihera ki ngā tikanga taiao maha, ko ētahi o ērā me āta mātakitia te nui o ngā pākawa ota me ngā pūtutaiwhetū i roto i te awa o Tukituki.

Kua roa nei a Ngāti Kahungunu e ātete ana i te whakatūtanga o te pāpuni wai, nā te ngoikoretanga o ngā whakawhitiwhitinga kōrero i ngā iwi hapū me te pōwaiwaitanga o ētahi o ngā kōrero.

Heoi ki tā te poari, tika ana te mahi whakawhitiwhiti kōrero ki ngā iwi. I tēnei wā kei te āta tirohia e Ngāti Kahungunu te pūrongo nei, kia mōhio ai rātou me aha rātou hei ngā rā kei te heke mai.

I whakaturia e te kawanatanga he poari motuhake o ngā mema tokorima, kia āta tirohia ngā tono mō taua pāpuni wai, otira, i tū ngā whakawātanga tuatahi i te Whiringa a Nuku o tērā tau.

Tata ki te toru tekau mano ngā pepa taunaki i kitea e te poari, ka mutu, ka puta tō rātou whakatau whakamutunga hei ngā wiki kei te heke mai nei.