Ngā kaupapa: Treaty Settlements, Tūhoronuku

Ka kati te wāhi tuku mema mō Tūhoronuku

Dean Nathan
  • Te Tai Tokerau

Nō te ahiahi nei i kapi mārika ai ngā pōtitanga mō te rōpū Tūhoronuku.  He kaupapa kia tohu i nga māngai kōrero nō ngā hapū o Ngāpuhi hei whakatatū o ā rātou kerēme Tiriti.  Engari, ehara i te huarahi ngāwari i te mea ko te tūtūtanga o te puehu me te wehewehe o ngā hapū ētahi hua kua puta.

E ai ki ngā kaiwhakahaere pōti o Elections NZ i tēnei wiki, neke atu i te ono tekau ngā tāngata ka whakataetae hei reo mā ngā hapū o Ngāpuhi ki te rōpū Tūhoronuku.

Hei tā Sonny Tau, o Tūhoronuku e mea nei, “Kia tukuna ngā hapū i ō rātou kaikōrero kia hou ki roto i te teneti.  Kāua e tū ki waho mimi ki roto me tū anō ki roto ka mahi ai ngā mahi ki reira.”

I tūtū ai te puehu ki ngā hui me ngā tiriti puta noa i te rohe mō tēnei whakahaere.  Nō ngā rā tata nei anō puta ai ngā whakapae mō te hē o ngā hua pōti ki te aroaro o Te Taraipiunara o Waitangi i tana nohoanga ki Hokianga.

Ko tā Pita Tipene e kii nei mō te take nei, “Nā kua mau te teka iaianei nā kua puta ēnā kōrero ki mua i te aroaro o te Taraipiunara. Kua mau ngā teka o Tūhoronuku.”

He poto noa iho te wā ka kapi te pōtitanga nei engari ka tūwherahia anōtia ki runga i te tono a Te Taraipiunara o Waitangi ki te karauna i tērā marama, ko tana āwangawanga inā te whānui o ngā kerēme o Ngāpuhi me te nui o ngā whakahē, kīhai i tukua e te karauna ngā whakamārama e tāea ai e ngā hapū tēnei take te whakatau tikangia.

Ka tāpirihia anōtia rā a Pita Tipene i ōna whakaaro e pēnei ana, “E mataku ana rātou kia Ngāpuhi I te meatanga atu kihai a Ngāpuhi i tuku i tōna mana motuhake ki tētahi atu.”

Nō te rā nei kapi ai tēnei wāhanga o te tukanga pōti mō Tūhoronuku mō te wā tuarua, ā, mā te wā anō e mōhio ai tātou ngā hua.