Ka kapia ngā tatau o Te Whare Kākano i Parakai

  • Te Tai Tokerau
  • Tāmaki Makaurau

Inapō, i tū tētahi whakatatae whaikōrero iti ki Te Kura o Parakai mō ngā ākonga kei te wāhanga Māori o te kura, arā ko te Whare Kākano rātou ko ētahi atu ākonga nō te Kura o Tau Te Arohanoa, he kura motuhake nō roto mai o Te Awaroa.  

Koia tēnei ko te wā whakamutunga, e kitea ai ngā ākonga o Te Whare Kākano e tū ana ki mua i te aroaro o te wā kāinga, ā, hei āpōpō ka kapi ōna tatau.

Kua rere te toki e kore anō ēnei uri o Ngāti Whātua Tūturu, e ako i roto i te reo Māori i ngā whenua o Te Kura o Parakai, nā te whakakapinga o te Wāhanga Māori.

Kīhai te tumuaki o te Kura o Parakai, a Sean Valvoi, i hiahia tuku kōrero ā-kāmera mai.  Ko tāna i tētahi īmera i tēnei tau, ka tūwhera tonu ngā tatau me he mea ka piki ake te tokomaha o ngā ākonga ki te 18.  I kake ngā nama ki te 17, ā, hei tā te tumu whakarei o ngā Maunga Whakahī o Kaipara, i tono hoki rātou kia hapai ake i te taha pūtea. 

Kei Awaroa, te Kura Karaitiana o Tau Te Arohanoa e tū ana, ā, ka kapi tōna rārangi ākonga ki te 50.  Nā kona, tokorua anahe ngā ākonga o Te Whare Kākano ka taea te whakawhiti ki reira. 

E 4 paiheneti noa iho te tokomaha o te hunga Māori o Kaipara e mātau ana ki te reo Māori, ā, hei te kapinga ake o Te Whare Kākano āpōpō, ka kore taua iti e rahi ake i te rohe o te tonga o Kaipara, anamata noa nei.