Ngā kaupapa: Land, Politics

Ka haere tonu te whaiwhai tonu e whā tekau tau whai muri i te porotēhi ki Takaparawhau

Mānia Clarke
  • Tāmaki Makaurau
  • Waikato/Te Waiariki

Hoki mai ki te ao mārama nei. E hia rau tāngata ka tū whakahē ki ngā mahi a te karauna kia whakatū he waahi whare ki takaparawha i ngā tau wha tekau ki muri. Ā he rā whakamaumahara tēnei mā rātou i tū ki te mura o te ahi i taua wa.

Ka hoki mahara, ka tangi te ngākau ngā uri nei mō ō rātou tūpuna i whawhai mō te hemo noa atu.

“Nā rātou i para te huarahi kia hoki mai i te mana motuhake o Ngāti Whātua o Ōrākei, i mea atu te Poutaki o te iwi, a Taiaha Hawke.

“Nā rātou te mana. Mei kore ko rātou ka kore ko mātou, nā reira he whakaaro aroha i tēnei wā me te mauritau o te ngākau.”

Wheoi kua hipa te whā tekau tau ā, inā te nui o ngā hua ka puta ki te iwi.

“Kua hoki mai i te whenua. Kua hanga tētahi pakihi, kia whai rawa mō te iwi. Waru tekau ngā whare kua hanga,” i kī atu a Hawke. “Kua hokihoki mai i te whānau ki te noho ki runga i te tūrangawaewae o ngā tūpuna, Kua hoki mai anō te reo, ara ake anō te reo i roto i a mātou.”

E whā tekau tau ki muri i mutu ai te noho porotēhi e rima rau mā ono ngā rā, a te hāukainga me ngā kaitaunaki i Takaparawhau, hei tohu i ngā whakaritenga a te kāwananga ki te hanga whare whai rawa ki reira.

Engari e tohe tonu ana te iwi i te kāwanatanga mō ngā take whakataunga whenua ā iwi kē atu.

“Kia aro mai te kāwanatanga ki ō rātou kī taurangi ki a mātou ki roto i ngā kerēme kua tau,” i kōrero atu a Hawke. “Ehara i te mea kua waitohuniga tērā kerēme kia riro atu tō mātou mana motuhake ki iwi kē.”

“I taua wā i aua tau i mauhere a Māori mā ngā ture o te kawanantanga me te kiriweti o ētahi o ngā tāngata o roto o te kāwanatanga,” i mea atu a Mabel Wharekawa-Burt o Tauranga Moana, Ngāi Te Rangi.

“Kei te haere tonu ngā mea i te rā nei.”

E kōkiri ana te iwi ki te Minita Whakatau i ngā take Tiriti, ki a Andrew Little ki te whakakore i ngā kerēme ā iwi kē atu ki te rohe o Tāmaki Makaurau.