Ngā kaupapa: Kapa Haka, Te Matatini

Ka eke a Pareārau ki te atamira o Te Matatini mō tā rātou wā tuatahi

Aroha Treacher
  • Te Tai Rāwhiti

Ko Pareārau tētahi o ngā rōpū hōu i kōwhiria, kia eke ki te atamira o Te Matatini i tēnei tau ki Ōtautahi.  I ngā wā o mua, he rōpū whakangahau noa, engari, ināianei ka eke rātou ki te mura o te ahi, te ao whakataetae kapa haka.

Hihiko ana te wairua o tēnei rōpū nā runga i te mōhio hei te kotahi wiki neke atu, ka whai wheako rātou i te whakataetae nui rawa o te ao.

Ae, he tauhou rātou ki tēnei momo ao whakataetae kapa haka, engari, ka kawea atu e rātou he kaupapa whakahirahira.

E ai ki a Aaron Parekura Matehe, “Kei te mahi tūkino tonu mātou engari, mā te matenga o ētahi ko Delcelia Witika, James Whakaruru nā o rātou kōhurutanga, ka titoa haka mō rātou, mō ngā cruz twins, Nia Glassie mā, he maha ngā tamariki e pāngia ana e te ringa o aituā o te mahi tūkino.”

Ngākau iti ana tō rātou tīmatatanga i te tau rua mano mā whā, ā, a tōna wā ka whai niho rātou i ngā mahi kapa haka, otirā, kua tīni te īngoa mai i Te Matau a Māui ki Parearau.

Ki tā Jackie Irihuia Ham, “He hōnore tēnei ki a mātou, he tuatahitanga tēnei mō Pareārau, i tīmata hei rōpū whakangahau, ko te whainga pū o te rōpū hei whai i ngā waiata o Ngāti Kahungunu o Rongomaiwahine, ngā waiata, ngā mōteatea me ngā haka.”

Kei te pupuri tonu i tō rātou Kahungunutanga me te Rongomaiwahinetanga, heoi, kia whakaatu hoki ai rātou te hononga o te waka o Takitimu ki a Ngāi Tahu.