Kaupapa: Kapa Haka

Ka arotakengia te kaupapa Te Mata Wānanga

Mere McLean
  • Waikato/Te Waiariki

I ngā tauira o te Wānanga o Aotearoa nō ngā takiwā e whitu i te motu i whakarauika ki Tauranga i tēnei rā mo Te Mata Wānanga whakataetae, ko te tirohanga whakamua o tēnei kaupapa e arotakehia ana ki tā ngā kaiwhakahaere.

Hei tā Jim Mather o Te Wānanga o Aotearoa, “E huihui mai tātau ngā whānau whānui o te Wānanga o Aotearoa ki te whakawhānui i tērā take ara, te kaupapa o kotahitanga.”

Ka tū te whakataetae ia rua tau i waenga i ngā rohe o Te Wānanga o Aotearoa. 

Hei tā Wiremu Beazley, “I konei au i te mea tuatahi, ā, kei konei tonu au, kāre he kaupapa i tū atu atu i te mātauranga mo ngā kaimahi o Te Wānanga o Aotearoa.”

Heoi, kei te titiro anō te Wānanga o Aotearoa ki te oranga o te kaupapa ki tua.

Hei tā Paraone Gloyne, “Kei te arotake aku rangatira, ngā tumu i te ahuatanga o te kaupapa, ā, kia pakari ai te kaupapa, he nui te tautoko o te taiuruuru, i te mata wānanga, nō reira ehara i te mea ka hiki te kaupapa, ka whakamoea rānei, ka turakina rānei te kaupapa.”

Kei reira ngā māharahara ki waenga i ngā kaihaka mo te arotake. Hei tā Peri Hogan, Ko taku tupatotanga ina ka whakamoea tēnei kaupapa, ā, ka moe roa pea koina tāku, kei te mataku au mo tēna ahuatanga.” 

I whakapaohohia Te Mata Wānanga e Te Wānanga o Aotearoa mā runga i to rātou pae tukutuku, ā, kukumetia ana te hunga kaimātakitaki mai i ngā piro katoa o te ao.