Kaupapa: Domestic Violence

Ka aro te kaupapa 'Bully Free Brovember' ki te whakahaumaru i ngā hapori o Aōtearoa

Mere McLean
  • Waikato/Te Waiariki

Ko te kaupapa "Bully Free Brovember" ka tīmata ki ngā pito maha o te motu hei ēnei rangi whakatā. 

Ko te whāinga, he whakakore atu i te mahi whakatumatuma me te whakahaumaru i ngā hapori e ora ai te tamaiti.

Ko tā te whakahau a Waereti Paraki o Te Waiariki Purea ki Rotorua, he take tēnei e titiro ana ki te hapori whānui kāua noaiho te hunga mātaatahi.

Ko tā te kaupapa "Bully Free Brovember", he whakaputa whānui i te kōrero, "Bully Free Bro."

E ai ki a Waereti Paraki, “Kia puta te kōrero, kei konei he āwhina, kei a koe he reo mō tēnei raru, kei a koe to mana, kāua e whakaae ki ngā whakawhiu, kei reira te hunga hei hāpai i a koe.”

Ko ngā taiohi Māori te hunga e tirohia ana e tēnei kaimahi kia piri ki tēnei kaupapa.

Hei tā Waereti Paraki, “Kia tū mai te hunga tāne ki te aukati i ngā mahi tūkino, kei te hono mātou i to mātou kaupapa rīpeka mā tērā ka tū hei te rua tekau mā iwa ō Whiringa ā Rangi i tēnei tau, me te titiro anō kia noho te marama nei hei marama aukati tūkinotanga.”

Ka hāngai hoki te kaupapa nei "Bully Free Brovember" ki tā Te Waiariki Purea Kaupapa mō te ripeka mā hei aukati i te mahi tūkino, me te manako ia ka puta whānui ngā kōrero whakahaumaru i te hapori.