Ka apīra te Marae o Mangatangi i te mahi keri a Glencoal

Heeni Brown
  • Waikato/Te Waiariki

Kua rewaina a 'Māori and Mining', he pukapuka e rangitāmiro ana i ngā take maina i Aotearoa me ngā pānga o te mahi keri ka utaina ki runga i ngā hapori me ngā iwi Māori.

Engari he rauemi tēnei e taea te ātawhai i ngā mana whenua o Mangatangi e whakahe ana i te mahi keri a Glencoal ki te takiwa?

Kei te tono-apīra tonu te marae o Mangatangi me te whakahē i tā ngā kaunihera e rua o Waikato i whakaae kia keri maina ai a Glencoal ki te takiwa o Mangatangi.

Ko tā Hori Katipa o Ngāti Āmaru me Ngāti Tamaoho, “Ko te raruraru kua pā mai ki a Mangatangi e korero mai ana ngā ripoata e waru tekau pea paiheneti te nuinga o te tangata kāre i hiahia ki tēnei taonga kua tohua mai ki mua i a matou”.

Ahakoa ngā kōrero a ngā roia ki te marae o Mangatangi, horekau he painga ki a ratou i te mahi apīra, e haere tonu ana te tono a te marae i runga anō i te take he wai-māori kei te takiwa e whakaarohia ana hei maina.  

Ko tā Te Rangi Kaihoro he māngai no Mangatangi, “Ko te pūtaketanga to tā matou maia tu rangatira ki te whakahē ki te kōti me kii ake kia pupū ake te wai hohonu a kui ma a koro ma I roto I te wai māori o te papawhenua”.

I tīmata ngā raru mo Mangatangi marae e rua wiki ki muri i te whakaaetanga a ngā kaunihera o Waikato kia keria he maina e te kamupene Glencoal, he apitihanga ki a Fonterra, i tētahi pito whenua ōna, he whitu tekau eka te rahi.

Inaianei kua rewa i Te Whare Wānanga o Ōtakou te pukapuka 'Māori and Mining' hei tuku māramatanga mo tënei mea te keri-whenua, e ai ki tētahi o ngā kaituhituhi o taua pukapuka a Tākuta Katharina Ruckstuhl “ehara i te whakaaro ngawari ki te korero ki tētahi pakihi he aha o whakaaro”.

Ki roto i te rauemi hou nei kua whakatakotohia e ētahi iwi e whakarite ana i te huarahi anga whakamua me ngā kamupene keri maina he tauira mo ēra kei te rapu māramatanga tonu mo ē`nei mahi, ā kua whakarite kōrero etahi e hāngai ana ki ngā hua o taua mahi ki te ohanga, te taha ture, te taiao me ngā tikanga Māori.

E meatia ana e Warahi Paki te heamana o Mangatangi Marae ka tukuna ta rātou apīra ā te Rāpare, tā te mea ka kapi ngā tono apīra i te take-keri a Glencoal hei te Rāmere.