Kaupapa: Tūhoronuku

Ka anga atu a Tūhoronuku ki te tatau pounamu

Dean Nathan
  • Te Tai Tokerau

Inapō rā timata mai ai te āwhio haere a te rōpū Tūhoronuku i te whare tapu o Ngāpuhi ki te whakamārama i ngā whakahaere kei mua i te aroaro e ea ai ngā wawata mō ngā hara a te Karauna kia Ngāpuhi anō.  Nō te rā nei ka hui tahi rātou me ngā hapū o Te Hokianga Nui a Kupe.

Ko ngā toka tū moana he akinga nō ngā tai o Hokianga engari ko te rōpū Tūhoronuku te aronga i te rā nei.

Hei tā te heamana o Te Rūnanga ā Iwi o Ngāpuhi, tā Sonny Tau “ko te mahi poroteihi mama noa iho nei, engari ko te ārahi i te iwi he mahi taimaha.  I tēnei wā e poroteihi noa iho e pahupahu ana engari horekau anō rātou kia whakatū tētahi huarahi hei whakatūtuki ai ngā moemoeā o Ngāpuhi Nui Tonu.”

Ko tā Tūhoronuku he whakamārama i ngā whakaritenga kei mua tonu i te aroaro e tutuki ai te hikoiroa ki te tēpu whiriwhiri a te Karauna.

E ai ki a Titewhai Harawira “Kei a te Karauna te wero nui. Pena kaore tonu o ratou hiahia i te ngata, ā, me hoki atu te taki i a ratou. Heoi ano, me mahi tahi tatou hei painga mo Ngapuhi Nui Tonu.”

Kāti, mai i Te Hokianga Nui a Kupe ka huri te kei o te waka o Tūhoronuku ki te rāwhiti hei reira hui ai me ngā kārangatanga hapū ki Matauri hei tēnei ahiahi pō.

Ka mea atu anō a Sonny Tau mō “te moemoeā o Ngāpuhi Nui Tonu nei kia nanati ai tēnei Karauna ahatia ko ngā korokē e whakahē ana ngā mea e whakaae ana koia tērā ko te tūmanako i te mutunga kia utua e tēnei Karauna ngā hara o ngā kāwana katoa ōmua.  Koia tēnei ko te tino kōkiri a Ngāpuhi, ā, i te mutunga mā Tūhoronuku tērā mahi e whakatutuki”