Kaupapa: Rena

Ka āki te iwi kāinga o Motiti i te kokoraho mō te mana ki Ōtaiti

Mere McLean
  • Waikato/Te Waiariki

Ka tahuri te titiro a te iwi kāinga o Motiti ki te aki haere i a rātou kokoraho mō te mana ki Ōtaiti, te nohanga o te kaipuke RENA, ki te whakahau i ngā rangatira o RENA kia hiki atu i te kaipuke rā.  

He kōrero tēnei ka whai ake i ngā whakapae mō ētahi mahi nanakia a ngā rangatira o te kaipuke RENA kia rata ai te hunga kāinga o Motiti ki te whakaaro, kia noho tonu te kaipuke ki tō rātou pātaka kai.

Ehara i te mea he kōrero huna te hiahia a ngā Māori o Te Moana a Toi kia unua atu te kaipuke o RENA i Ōtaiti, i tēnei wā kua tū rātou ki te aki haere i te kōrero.

Whai muri i ētahi huinga e rere ana ngā whakapae mō ngā kaipupuri o RENA me tā rātou ake haere i ngā iwi kei te tuawhenua me te moutere o Motiti kia tautoko i tā rātou hiahia kia noho tonu te RENA ki Ōtaiti, engari mai anō te whakahau a ngā iwi kia tango te kaipuke mai Ōtaiti.

Toru miriona kua whakapauhia e ngā kaipupuri o RENA ki ngā mahi whakatika, heoi ko tā Buddy Mikaere, māngai mō te moutere o Motiti he mauri to te taiao.

Kīhai ngā kaipupuri o te RENA i whakaae, i whakahē rānei ki ngā whakapae i puta mō rātou, heoi mō te iwi kāinga o Motiti ka whai rātou i ngā huarahi kia hahū te kaipuke o RENA mai Ōtaiti.