Kaupapa: Waitangi

John Key

  • Te Tai Tokerau

I pae katoa mai te titiro o te motu ki Te Tii Marae, i te whakaeketanga atu a te Pirimia a John Key ki te whakakanohi i te Kāwanatanga.  Ahakoa kāore i pākaha te rahiri atu i a ia, i kaha tonu te rere o ngā wero.

I ngā tau kua taha, tīmata ai ngā raru i te waharoa o Waitangi, heoi, i kauparetia tēnā nā te kakama o John Key.  

I rangona te ihi me te wana. Engari i mau tonu ko te wehi.  Na Bill English te taki tuatahi i hiki ake. Engari ko te wero nui mā te Pirimia.

Heoi, i a ia i te whare, tērā ngā tāngata ruarua e kōhete ana i waho. Ā, ko te tuku, kahore rānei, o Ngāi Māori i tōna rangatiratanga te take.

Nā Kingi Taurua tēnei reta i hora ki a John Key, i waitohungia e ngā rau uri o Ngapuhi.

Hei tā Taurua, “He maha ngā kaiwhakahaere i te Taraipiunara o Waitangi kei teitei ake o rātou mātauranga i te kāwanatanga, teitei ake o rātou nei mōhiotanga i te kāwanatanga. Nōreira e mauamu noiho na te kāwanatanga i tēnei, he rapu kōrero ana hei whakaiti te Taraipiunara.”

Kāti ko te pakanga o ISIL tērā i tohea hoki, ā, i kaha wawao a John Key mō te hemo tonu ata.

Heoi, na ana kōrero mō te kereme o Ngāpuhi i takariri ai te hau kainga.

E ai ki a Taurua, “E mea ana ahau ko ngā mahi a te Kāwanatanga he whakatikatika i ngā wāhi noho i konei, he whakatikatika i ngā wāhi mahi. Koia tērā ko tā rātou mahi. Ko mātou e utu take ana e utu take ana mō tērā āhuaranga.” 

E ai ki a Kingi Taurua, katoa katoa, he wairua whakahīhī to Key, whakatamariki hoki.

Ki tā Taurua, “Koia tērā te mahi a te Kāwanatanga, he whakaiti noaiho horekau kē ōna nei mātauranga, ōna pukenga. Hoi anō ko tōna oukenga he Pirimia mō tēnei motu engari ka tae atu ki wō tātou nei hītori o te ao Māori kaore ia i te mōhio he aha te pito, he aha te tīmatanga, te mutunga rānei.”

He tohu pea o te roa o Key ki te turu Pirimia, he tauira anō rānei o te tirohanga rerekē a ngā hoa Tiriti o Waitangi.