Kaupapa: Tā moko/Kirituhi

Indigenous Ink - Pūrongo Motuhake

  • Tāmaki Makaurau

He kohikohinga o ngā Kaitā Moko mai Aotearoa, mai ngā Moutere o Porinīhia, Meranīhia ano, me Whiripino, ko te Ahurei tēnei e kiia nei ko ‘Indigenous Ink’.

He kaupapa i timata mai i te tau 2011, te tau i tū ai te Whakataetae Whutuporo mō te Ipu o te Ao, ki Aotearoa nei. I tēra wiki ka whakakao mai ano ngā Kaitā Moko o te ao ki Tāmaki Makaurau.                       

Ko te whānau o Gordon Toi no Ngāpuhi, tētahi kua tino aronui mai ki te kaupapa o te Tā Moko, i raro i te mana o te whare e kīa nei ko ‘House of Natives’.

He maha ngā hua hei ta Gordon Toi o te mahitahi ā whānau nei, tua atu i te hapai i tēnei taonga te Tā Moko, he oranga nui ano kei roto i enei mahi mo ngā whakatipuranga.

Hei tā Gordon Toi, “Kikī ana te Whare o Native i te rā nei, ko taku hoa rangatira, a māua tamariki, kaihana katoa e tautoko ana, he miharo ka kī ana te whare.”                

Hoki mai ki te kaupapa o ‘Indigenous Ink’, kāre e pau ngā mihi a ngā Kaitā Māori, me te aha kua kite ratou i ngā ahuatanga orite, ngā ahuatanga rerekē o ngā Ta Moko, me nga mea atāhua o te tūhonohono ki ngā toki Tā Moko no iwi kē, i roto i te whanaungatanga, me te manākitanga.

Hei tā Kingi Pitiroi, “He kaupapa tino pai, nei ra matou ngā kaiwhakairo tangata o te motu, otirā o te Moana nui a Kiwa e hehere nei, e tuitui nei i ngā taurahere tangata i runga tonu ano i te takapauwharanui a Niwareka, i runga tonu ano i te kaupapa a Mataora, kia whakanuia a tatou taonga tuku iho, otirā hei whakakitenga ano ma te iwi.”                            

Kua tō te rā ki runga i tenei huihuinga o Indigenous Ink 2014, heoi e tumanakotia ana ka whakakotahi ano ngā tohunga Tā Moko Māori, Porinīhia, Meranīhia, Tahiti, Papua New Guinea, Whiripīno ano hoki me etahi atu iwi o te Ao ki te whakanui i te taonga, kia pupuritia mo ake tonu atu, kia kore e memeha noa.