Kaupapa: Rugby

I whakarauika mai ngā toa rangatahi o te tākaro takiwhitu ki Tāmaki Makaurau

updated
  • Tāmaki Makaurau
Condor Sevens Secondary tournament

I whakarauika mai ngā toa rangatahi o te tākaro takiwhitu ki Tāmaki Makaurau i ngā rangi whakatā mō te whakataetae ā-motu e kīia nei ko te Condor Sevens.

Ko te Kura Tamatāne o Rotorua me te Kāreti o Scots nō Te Whanganui-a-Tara ngā tira i whawhai mō te taitara i tēnei tau, ā, i te whiringa toa a ngā tamāhine ko te Kura Tamawahine o Kirikiriroa tērā i tuki ki te Kura Kōtiro nō Murihiku.

Ka pōhēhē kāhore he piro i te haurua tuatahi i te whiringa toa o ngā tamāhine kātahi ka whawhai ai te toa pāwhutupōro o Aotearoa a Awatea Whitiora Te Uira i te rārangi wawao kia puta ai te ihu o tana kapa o te kura tuarua tamāhine o Kirikiriroa ki mua, e whitu ki te kore.

I te wehenga rua i whakamārama atu te kaiako o Kirikiriroa i te rautaki tākaro kia puritia ai te tukinga.

Whai muri i tētahi hāmene pātata ki te rārangi piro, ka whai piro te kapa nō Murihiku.

Ko te kapa nō Kirikiriroa ngā toa o tērā tau engari nā te paunga o te hau ka kokiri anō te hoariri ki te rārangi piro kia ārahi te tukinga tekau mā rua ki te whitu.

Heoi i te meneti whakamutunga, i puta mai anō te whetu o te kapa a Awatea Whitiora Te Uira.

Nā te tutukinga o tēnei whana piro, ka eke anō ngā tamāhine nō Kirikiriroa, ka riro anō i a rātou te taitara nui whakaharahara nei.

Ki te whiringa toa mō ngā tamatāne ki waenga i te kura tuarua tamatāne o Rotorua me te kāreti o Scots. Heoi ko Rotorua te tira tuatahi i kitea te kohau, ā, ka oma atu ki te rārangi piro.

Hei muri tata nei ka whai hua anō rātou me ngā piro e rua. Rua tekau mā tahi ki te kore te tatauranga.

Kāhore te hoariri e takato noa, i mua tata i te wehenga rua ka whawhati ai te rārangi wawao ka whai rātou i tā rātou piro tuatahi.

Nā te kāpene nā Isaac Te Aute nō Rotorua te piro tuatahi o te haurua tuarua i tutuki kia whānui ake te tatau rua tekau mā waru ki te whitu.

Ahakoa e rua anō ngā piro a te kāreti o Scots, he pakari ake ngā tama nō Rotorua, kia wikitōria toru tekau mā toru ki te tekau mā iwa me tā rātou taitara tuatahi o te whakataetae ā-motu nei.