Kaupapa: Matangirua - Finals Day

I whakapou kaha te katoa o ngā kapa i te rā whakamutunga o Te Matatini

Heeni Brown
  • Te Waipounamu

Ko ngā whiringa-toa te rangi whakamutunga ki te whakataetae o Te Matatini. E iwa ngā kapa i tuwhirihia ai e ngā kaiwhakawā, ki ngā whiringa toa whiriwhiri ai he toa whakaihu waka.

Ko ia ko te kakenga o ngā kapa o Te Whānau a Apanui mai i te tūranga tuatoru ki te tūranga toa. Ko Ōpōtiki Mai Tawhiti ratou ko Te Mātārae I Ōrehu i eke ki te tūranga tuarua o te whakataetae.

Ehara Te Pou o Mangataawhiri i te tauhou ki ngā whiringa-toa.

Engari ko te tū i te rangi nei, ehara i te tū mā ngā kaiwhakawā anake.

Ko tā Tony Walker, "He āta uaua tenei i te mea he nui ngā mate kei runga i a matou, kei runga i ngā kapa a rohe engari koina ko te korero o te rahui ra, ko te mahi a te hunga ora kei te mōteatea te mihi atu ki te hunga mate."

Tekau tau te para a Ngā Tumanako i te huarahi kia tae mai ki konei, ko rātou anahe te kapa-hou te uru mai ki ngā whiringa toa.

E ai ki te kaitātāki tāne ki tā Kawariki Morgan, "kua eke i teenei ra hihiri ana te ngakau whakahihi au ki taku kapa me nga mahi kua oti I a matou I nga marama tata kua hori nei me nga tekau tau kua hora atu ra"

A, tērā te hītekiteki a Te Waka Huia, kāore ngā toa o te wā, i noho noa ki tō rātou taumata.

Ki tā Annette Wehi,"I kī mai tētahi o ngā koroua i te ata he uaua kia piki ki tēra taumata engari he uaua rawa atu ki te noho ki reira. Koira te korero, a e tino whakapono ana mātou ki tēra."

Ko Whangarā Mai Tawhiti te whai i te pae-tawhiti, ko tā Derek Lardelli,"Kei nga kaiwhakawā te mahi taumaha, he mahi uaua tēna te māka, te mea i ētahi waka rerekē ngā māka, engari ki au, tukuna kia rere i runga ano i te rangimarie, mo ngā māka kua tukuna kua tukuna ne, waiho kia tarewa ki te rangi"

E ai ki a Tāmati Waaka, ko te rerekē o te tū kei te whakawāhia. Hei tāna anō tāria te wā pena kei te rata ngā kaiwhakawā ki te tū o Te Whānau-a- Apanui.

Ko tāna ano,"Whakatakotohia he mahere e tō mātou rangatira, ka whaia e mātou ki tērā, kit e kore e tutuki I a mātou kua riria mātou, kit e whai I a mātou tēra arā ko te tumanako kei roto I ngā whakaaro o ngā kaiwhakawā."

Mai anō i te tau whitu tekau mā rua a Te Waihīrere e takahi ana Te Matatini, koinei te rapu i tōnā taitara tuaono.

E ai ki a Ruth Smith, “"Ko ngā mahi ināpō rā, he āta whakatau I te mauri, I runga anō I te mōhio ko ēnei rōpū pēnei nei I a Te Waka Huia, ngā rōpū katoa o te whiringa whaiti he toki ki ēnei momo mahi.”

A, kuhu mārika ana a Te Mātārae I Ōrehu hei māngai mō Te Arawa, ki te rapu i tōnā taitara tuatoru.

Ko tā Wetini Mitai Ngatai,"Ko te mea e whai ana e matou, kia oti pai ai a matou mahi i runga i te kaha, te kaha o nga reo, te kaha o nga nekeneke tae noa ki toona mutunga."

I mohio pū a Te Iti Kahurangi, e ai ki a Kingi Kiriona, “Ahakoa ko te wikitoria te kaupapa e whaia ana e te horopaki o te whakataetae, koia te kaupapa e whaia ana e nga kapa katoa e matou hoki.”

Ko Ōpōtiki Mai Tawhiti te rōpu whakamutunga ki te takatū i te papa.

Hei tā Anameka Pirini ko te kawe mai i ō rātou kaupapa ki tēnei taumata te mea nui mō rātou.

“Ko te hari mai i to mātou tipuna a Mokomokko ki tēnei pae hei whakatū hei hitoria mo te iwi whānui, engari mo te iwi whānui.”