Ngā kaupapa: ANZAC, Prison

I whai wāhi ngā mauhere ki te whakanui i te rā o ANZAC

Wepiha Te Kanawa
  • Tāmaki Makaurau

I tīmata wawe ngā mahi whakamaumahara ki ngā hōia o Aotearoa me Ahitereiria, mā ngā kaimahi me ngā mauhere o Te Whare Herehere o Maungawhau i tēnei tau.

He kotahi rau ngā tangata nō te hapori, ngā kaimahi me ngā mauhere i whai wāhi, me te tuku haka hoki ngā mauhere i titoa motuhakengia mō tēnei kaupapa.

He tō i te mana me te kaha o rātou mā i hinga i te pakanga, te mahi a ēnei mauhere.

E ai ki tā rātou kaiako reo Māori, a Bradley Wiki-James, “Koinei te tūmanako ki te whakatūhono, ki ahau nei ngā ao e rua i waenganui i te kaupapa kotahi.”

Ko Maungawhau anake te whare herehere o te motu e tuku ana i ōna mauhere kia whakamaumahara ā-ōkawa i ngā hōia o ANZAC.

Hei tā Wiki-James, “Nā rātou te haka i tuhituhi e pā ana ki ngā momo atua Māori, ko taku nei whakaaro mō tērā tūahuatanga he mea pai ki te whakamaumahara atu ki a rātou ko ngā tūpuna mai rā ano tae noa ki ināianei ki te hono atu i ngā atua Māori ki a rātou anō.”

I whai wā hoki ngā mauhere ki te kite i te tikanga o te rā ANZAC ki tā te akonga titiro.

Ki tā Karma Roberts, “He wā pai tēnei mō ngā tauira i roto nei ki te rongo i tētahi reo hou, i tētahi taiohi o te motu nei, he wā pai ki ako rātou i ngā mea hou pea, ngā tirohanga hou.”

E manako ana a Maungawhau kia puta tēnei kaupapa ki te motu.