I tū tētahi tangata horoi matapihi ki mua i te aroaro o te taumata whakawā ā-marae

Heeni Brown
  • Tāmaki Makaurau
Mansell Dickson faces Papakura Marae Justice

Ko Mansell Dickson, e rua tekau mā rima tau te pakeke, tētahi o ngā tāngata tekau kua ūhia ki ngā heitara mō te horoi matapihi waka i Tāmaki Makaurau.

I te rā nei, i tū ia ki mua i te aroaro o te taumata whakawā ki te marae o Papakura.

E takahi ana a Mansell Dickson i te ara ki te aroaro o tēnei taumata whakawā o te marae, mō ngā hāmene i ūhia i a ia e horoi motoka ana.

Kotahi wiki ki muri i tū a Dickson ki te kōti, me te tūpono ka uhia te whaina nui rawa, rua tekau mano taara, ki te hamenetia ia mō te mahi whakatū motoka, whakahōhā rānei, i a ia e horoi motoka ana i tēnei whakawhitinga rori matua o Cavendish. 

E ai ki a Brian Maurice, "Kua murua ēnā hara mehemea ka haere ki te whakawā i a ia, ka murua ēnā hara katoa, engari he kaupapa anō mehemea kua kore e ia e whakaae ki ngā taumata kua whakaritea hei mahi mōnā."

Kahore mātou i whakaaehia kia whakapāho i ngā kōrero o tēnei whakawātanga. Engari, ko te pānui i ngā kōrero whakarāpopoto a ngā pirihimana te mahi tuatahi ki tēnei rūnanga whakawā.

Kātahi ka whiriwhiri kōrero me te tangata kua karangahia ake ki te pae.  Mutu rawa iho ka tuhituhi i tētahi kawenata whakaae ki waenga i te taumata-whakawā me te tangata kua ūhia ki ngā hamene.

Iaianei na, ko te kawenata kua waitohua, ā, kua whakaaetia e te taumata whakawā marae nei, ka tau mō te ono wiki. Nā, ki te kore a Mansell Dickson e aro mārika ki tēnei kawenata, ka Whakahokia te kēhi nei ki te Kōti.