I tētahi tangihana te māmā o tētahi tama porohaurangi kua ripenehia

  • Waikato/Te Waiariki

E tūmeke ana te tini i tētahi ataata kua puta ki Youtube e whakaatu ana i tētahi tama Māori kei te takiwā o te waru ki te iwa tau te pakeke e haurangi ana i tētahi papa tākaro ki Fairfield i Kirikiriroa.

He kai-eke papa wīra i kapo ake i te tamaiti nei ki te pūrere whakaahua, nā runga i tōna ohorere ki te porohaurangi o te tama. Ināianei kei te arotakengia tēnei take e te ope pirihimana.

He rangatahi tokorua ano ēra i tīmata ki te kapo ripene i a raua e mātakitaki ana i te tama porohaurangi, i te pāka o Clarkin Road i Fairfield Kirikiriroa.

Me te mea nei, ko te whakapae a te tama hourangi, ko tetahi o āna whaea kēkē te kaituku i etahi inu waipiro Cody's, he whitu paehēneti te nui o te waipiro i rō ia kēne, ki a ia.

Ko te whakapae ano o taua tama, ko te kai tarutaru ano te mahi.

Me te wero a tōna tuakana ki te rangatahi kairipene, he pai tonu kia inu waipiro tana teina ahakoa tana pakeketanga kōhungahunga nei, i te mea he Māori ia.

I a matou e whakaahua ana ki te papa retireti o Fairfield i kōrero matau ki te māmā o te tama kare ia i hiahia ki te kōrero ki runga kāmera engari ko tāna, i tētahi tangihana ia, a nā tētahi whanaunga tawhiti ia i whāngaia ki te waipiro rā.

Ko tā ētahi atu mema o te hapori Ehara taua ahuatanga i te ohorere ki a rātou kua kitea kētia ētahi rangatahi e inu waipiro, e kai tarutaru ana, heoi kihai rātou i te mohio me pēhea te whakakore i aua mahi.