Kaupapa: Kōhanga Reo

I te Whare Pāremata anō te poari matua o te kōhanga reo ki te whakarite hanganga hou mōna

  • Te Whanganui-ā-Tara

I te Whare Pāremata anō te poari matua o te kōhanga reo, ā, ahakoa ko te pire reo Māori tā rātou i haere ake ai, ko te whakarite hanganga hou mōna te aronga nui i tōna wehenga atu.

Me kī i kahakina te tapaetanga a te Poari Matua o Te Kohanga Reo mō te pire Reo Māori e Hekia Parata tonu, mōna i whakaputa karere pāpāho i ngā mema o te poari e noho ana ki te aroaro o te kōmiti whiriwhiri Māori.

Ki tā te karere pāpāho i hui tahi ai te poari me Hekia Parata raua ko Te Ururoa Flavell inapō me te whakatakoto i te mahere ka hīkoitia e rātou kia tau noa te puehu.

I te taenga whakamutunga mai o te Poari Matua ki te Whare Pāremata ko a rātou raru tarawhare te take. Ā, i te Poari e tuku tapaetanga ana mō te pire reo Māori, ko aua raru anō i hauhake ake e te Minita Mātauranga.

Ae mārika e tuia tonu ana ngā ngutu o ngā mema poari, engari anō ki ngā minita. I hui tahi ai ratou inapō, ki reira whakapuakitia e te Poari ka kōkiritia ana mahi aruaru i ngā whānau kōhanga reo mō tētahi hanganga hou hei te marama e tū mai nei.

Hei tā Parata, “Hei te marama o Maihe ka haere rātou ki te whenua te kōrero ki ngā kōhanga ka mutu tērā ka hoki mai anō rātou te kōrero me pēhea.”

Ko tētahi o ngā hiahia a ngā whānau kia whakakorehia te ture e noho ai te mema poari ki tona tūranga, ā, mate noa. He ture kei roto tonu i te kawenata matua, ahakoa i whakahoungia e te poari i te paunga o tērā tau.

Ki tā Parata, “Kei te whiriwhiri tonu rātou i waenganui i ngā kōhanga ērā momo āhuatanga pērā kei roto i to rātou ture.”

Kāti e ai ki a Nanaia Mahuta o Reipa, me wawe ta te Poari whakatau i tēnei take kua roa e noho tārewa ana. 

E ai ki a Nanaia Mahuta, “Tai timu, tai pari. Kua tae ki te wā ki te tini te hanga o te poari ki te whakamārama aua tinihanga ki aua kōhanga reo me aua whānau.”

Kāti e ai ki a Hekia Parata ina whakatauria katoatia te taha mō tētahi hanganga hou, katahi rano ka tīmata te anga whakamua o te kokoraho Tiriti a Te Kōhanga Reo.