I te pikinga ake o ngā ohotata huarere ki Aotearoa e piki ana hoki te hiahia mō ngā kaihanga ohotata

  • Te Whanganui-ā-Tara

He rongonui i te ao, te kai-hoahoa whare tū i te ohotata, a Regan Potangaroa. Koia tēnā e mea ana, me tokomaha ake ngā mātanga pērā i a ia, i te pikinga ake o ngā whiu a Rūaumoko, a Tāwhirimātea.

I te pikinga ake o ngā ohotata huarere ki Aotearoa e piki ana hoki te hiahia mō ngā kaihanga ohotata.

E kī ana a Potangaroa kāore i te maha ēnā momo mātanga i Aotearoa nei nā te mea kāore tātou i aro atu ki tērā ahunga. Ko ngā tangata pērā kua haere ki tawāhi mō te tangata te take. Ka taea te noho pērā ki Aotearoa? E kī ana ahau, āe ka taea.

Kua hari a Regan Potangaroa i ōna pukenga pūkaha, hoahoa hoki ki ngā motu maha o te ao kua pākia e te ohotata me te pakanga.

Hei tā Potangaroa, kei a tātou te hangarau ki te whakatau i ēnā raruraru, ā, ko tō rātou hiahia kia awhina rātou e te kawanatanga ki te mahi i te mahi nei.

I muri i te rūnga whenua i Haiti i te tau 2010, i āwhina a Regan ki te whakatū pakitara hei aukati atu i te waipuke ki ngā pā kāinga papatahi. Hei tāna, ka taea te whakamahi i ēnei momo pūnaha ki kōnei ki Aotearoa.

E ai ki tana, ki Haiti, i hangaia e rātou ngā whare e 2200 ki te taha o te International Federation of the Red Cross. Ēngari mō Patutatahi, me hanga whare kaupare wai ehara ērā e aukati wai. He tino rerekē ēnei mea e rua.

Hei āpōpō, ka tū a Potangaroa ki te kōrero mō te kaupapa nei ki Te Herenga Waka Marae.