I tata hokona atu ētahi mekameka rino

Wepiha Te Kanawa
  • Te Waipounamu

Kei te pukuriri tētahi uri o te maunga titohea a Taranaki i te mea i tata hokona atu tētahi taonga nō te wā o ōna mātua tūpuna.

Hēoi anō rā, hei tā te mātanga o ngā hītori o Taranaki, tā Ruakere Hond “Kāore i te whakaaro atu ki te kino, ki te hē rānei o tēnei hokonga, he mea tāhae ēnei tāonga, he mea tango atu, riro atu tēnei tangata i tēnei e hokona ana.”

Ko ngā mekameka waewae nei i tihorea ake i tētahi ana e toru tekau tau ki muri, ā, i tata hokona i te ata nei.

Engari tonu rā, ko te mea nui kē, hei tā tētahi kaumatua nō roto mai o Te Rūnanga o Ōtākou, tā Edward Ellison, ko taana e mea ana “i te āhua tūmeke ahau ki te rongo atu kua tukuna ēnei mea hei hokotanga atu, me te mea anō hoki, kīhai tonu ngā tāngata whenua i whakamōhiotia. Tēnā pea he hononga anō tō te mana whenua, ā, kei te mōhio pū ahau i te pātanga a ngā iwi o Taranaki ki ngā rino nei, i te mea hoki, ko ō rātou tūpuna tonu i mauheretia ki Ōtākou nei e hia kē nei tau ki muri”

Nā tētahi tangata ngā meka i kite i te takiwā o te rori o Portobello, ā, e ai ki tētahi kaumatua o te Rūnanga o Ōtākou, koia tētahi wāhi  i mauherea ai ētahi Māori no Taranaki i whiua ki te mahi.

E ai ki a Ruakere “He nui atu anō ngā wā i mauheretia atu ai ngā tāngata o Parihaka, engari koinei tētahi o ngā tino wāhi, i tēnei wā kāore i te tino mōhio mehemea he pono ēnei, he mea rūpahu rānei nā te tangata, i runga i te mea ki ētahi ka kii kāore pea i te tino hāngai te hanga o ēnei ki ngā momo here o ērā wā.”

I kōrero atu tā mātou karere a Wepiha Te Kanawa ki te rangatira o te whare hokona i te rā nei, ā, ko tāna kua tangohia ngā mekamea waewae rino i te rarangi hoko nā te kaha tautohetohe o ētahi iwi, kua whakahokia atu ngā taputapu ki te kaipupuru tika.

Hei tā Ruakere anō “Kia mātou, kāore i te tika te hoko, kāore i tika te tahae, me hoki ēnei o ngā taonga ki ngā tāngata e tika ana ki te tiaki i te māuri, i te tapu o ēnei tāonga.”

Ko tā Edward Ellison i tāpiri ai mō te iwi o Taranaki e mea ana “kei te tino pōuri a Taranaki maunga i ēnei āhuaranga kua puta mai, me te mea anō hoki, e hanga ohorere ana i te kūare a ētahi ki a rātou anō”

Ko wai ka mōhio ka ahatia ngā mekameka, engari mēnā he taonga nō te wā i a rātou mā, ko whakahoki ki te iwi te wawata nui.