Kaupapa: Polyfest

I tae atu te Pirimia a John Key ki Polyfest

Heeni Brown
  • Tāmaki Makaurau

Ehara i te mea ko Tāmaki Makaurau anake kei te whakanui i te rā whānau whā tekau o Polyfest.

I tae atu hoki te Pirimia a John Key, ā, kāore te rangatahi i wehi, engari i whiuwhiu haere i ō rātou whakaaro mōnā.

Pukana ana, whētero ana, whakahīhi pai ana.  Koinei tā John Key haere mai ki Polyfest.

E ai ki a Chris Selwyn, "He rawe te mōhio kei te tautoko tonu te kāwanatanga i tēnei kaupapa nātemea kātahi anō mātou kua hōmai i te $200,000 mō te Polyfest Trust kia haere tonu ngā mahi mō te tau kei te heke mai."

I tērā tau nā te huarere i raru ai ngā pūtea a Polyfest, engari tērā te tautoko mārika a te kāwana i te kaupapa.

Engari, ahakoa ngā tautoko koira ngā whakahē a ētahi rangatahi i te Pirimia.

Tā te Pirimia, kei a rātou te tikanga ki te whakaputa i ō rātou whakaaro. Engari, kahore a ia i te whakaae ki ngā porotēhi whakaiti i a ia.

Mō te rua rā iaianei, he tata ki te toru tekau ngā kapa kua takahi i te papa tūwaewae Māori, engari ehara i te mea ka mutu ngā mahi i konei, hei āpōpo tīmata ai te whakataetae wāhanga taumata tuarua.