I tā tētahi rōpu rangatahi i ngā tātai whakapapa ki te whare o ngā Pirihimana o Kirikiriroa

Te Kāea
  • Waikato/Te Waiariki

He whakairo i ngā tātai whakapapa ki te kiri o te whare o ngā Pirihimana o Kirikiriroa. Koinei te mahi a rōpu rangatahi o Tainui, hei whakamarie i te whare me ngā kōrero tuku iho o te takiwā o Waikato-Tainui. Ko te kaitiakitanga te whakaaro motuhake, koia hoki te pikitia ka kitea.

Te hunga rangatahi, te whare Pirihimana, ngā mahi tā ki runga pakitara. Hei te nuinga o te wā he mahi tūkino te tirohanga.

Kei te hiahia a Te Kāhui Rangatahi ki te whakapakari ake te hononga ki ngā Pirihimana.

E ai ki a Kirimaku Kihi o Te Kāhui Rangatahi, “Kia rangona te reo rangatahi. Ka pai ake te hapori mehemea he whanaungatanga i waenganui ia mātou me ngā Pirihimana.”

Ki tā Mokena Hawkins, “Kaore ahau i mohio ka oho ahau ki te haere mai ki te tā ki runga i ngā pakitara o ngā Pirihimana, otira he mahi pai e haere ake nei.”

Kua kite ngā Pirihimana o Waikato, ko ngaa mahi toi, he huarahi kōrero hei whakangāwari i te noho ki ngā momo whare nei, koia hoki he ara kōrero e mārama nei ki te hunga rangatahi.

Hei tā tētahi pirihimana a Greg Nicholls, “Hei pouarahi mō te rohe nei, i kite mātou ka taea te karawhiua te taha whakapapa, te taha tikanga ki roto i ngā mahi a te rangatahi.”

Ki tā Kirimaku Kihi, “Koinei ngā muka maunga o te takiwa o Waikato-Tainui, me te awa tūpuna o Waikato, otira ko te taniwha nei ko Tūheitia. He tohu mo te kaitiakitanga ahakoa ko wai koe.”

I hono ai ngaa Pirihimana ki te whare herehere o Waikeria, na ngā mauhere i tā ngetahi pikitia hei whakaaro, mai te timatanga o te kuhu ki Ngā whare herehere, tae noa ki te putanga mai. Ko te whainga mō naianei, kia mārama ngā Pirihimana ki tōna rohe.

E ai ki a Greg Nicholls, “Kaore ētahi  o mātou i te tino mōhio ki te taha Māori, he miharo hoki, mā te hunga rangatahi nei e kōrero mo ngā tātai hononga e mahi nei rātou.”

Koinei te ruma o te pouherenga Māori o ngā Pirihimana, koinei te wahanga tuatahi, mai konei ka whiu whakaaro mō tētahi atu ruma hei tā i te hononga ki Te Kingitanga.