I maumahara te marae o Kohupatiki i Waipureku i te hainatanga o te Tiriti o Waitangai

Aroha Treacher
  • Te Tai Rāwhiti
I maumahara te marae o Kohupatiki i Waipureku i te hainatanga o te Tiriti o Waitangai, he kotahi rau whitu tekau mā rima ngā tau ki muri. Ko tā ngā kaumātua o reira, he waahi tō te tiriti tonu i ēnei wā, otirā, me whawhai tonu a Ngāi Māori kia pupuri tonu mā ngā whakatipuranga e heke mai nei.
 
I rāhiritia te kāwana tianara a Jerry Mateparae e te hau kainga kia whakanui i tēnei o ngā rangi hītori nui.
 
E ai ki tētahi kaumātua, a Bevan Taylor, "Ko te mea nui hoki nō Kahungunu tēnā, tino harakoa te ngākau."
 
Hei tā Harlem-Cruz Ihaia, "He rangi whakahirahira i te mea mīharo rawa atu tēnei kaupapa ki te whānau nei o Kohupatiki nui ngā parakatihi ka whakaako hoki."
 
I te wahapū o te awa o Tukituki i tāmokohia te tiriti e ngā rangatira o Ngāti Kahungunu a Te Hapuku rātou ko Waikato, Mahikai i te marama o Piripi, i te tau kotahi mano waru rau whā tekau.
 
Ki tā Maihi Cook, "He akoranga nui i roto i tēnei kaupapa mō te hunga rangatahi ko te take kei te haramai te karawatiana i tēnei rā, he mea whakahirahira mō te marae o Kohupatiki me Ngāti Kahungunu whānui hoki."
 
E ai ki ngā kaumātua, he whawhai tonu kei te haere kia pupuri tonu ai te mana o te tiriti.
 
E ai ki a Bevan Taylor, "Me tū pakari tātou i roto i tērā, tērā me kī tātou te iwi māori mai i inaianei mō ake tonu atu koira te wero ki te kāwanatanga ki te huri mai ki ngā kōrero a te tiriti kaua e takatakahi i ngā tikanga i hainatia e o tātou tino rangatira o taua wā."
 
Ko tā ngā kaumātua kāore a Te Hapuku i te hiahia tāmoko i te Tiriti, engari, i haina ia i raro i te uauatanga.