I huraina tētahi kōrupe i te tūwheratanga o te whare pukapuka hōu o Te Rakipaewhenua

  • Tāmaki Makaurau

He tuarua te mahi nui kua ea i te rōpu whakairo nō ngā iwi mana whenua, i Ngā Whao Tapu o Tāmaki Makaurau, i te huranga mai o te kōrupe e mau nei ki te whare pukapuka hōu o Te Rakipaewhenua. Ko Te Pātaka Kōrero o Te Hau Kapua tērā i whakatūwherahia i te ata nei.

Ko te whare pukapuka o Devonport i hangaia i te tau 1953, ā, he maha ōna nei whakatikatika, whakapaipai, whakahoutanga i roto i ngā tau, heoi koia tēnei i roto i tōna kororiatanga inaianei.

Hei tā Hauauru Rawiri, “Ngāti Paoa, Ngāti Maru me kī Marutuahu, Ngāti Whatua, Te Kawerau a Maki, Ngāi Tai, Ngāti Tai, te mihi atu kia rātou te whakatutuki i te kaupapa, te whakahaerehia ngā karakia tawhito a o tātou mātua tūpuna kia tarai hoki i wenei taonga.”

Nō ngā haora o te atatū nei i takia ai ngā karakia hei whakatūwhera i te whare pukapuka hou, kua tapaina nei e ngā mana whenua o te rohe, ko Te Pātaka Kōrero o Te Hau Kapua.

E ai ki a Rawiri, “He īngoa ka tautokohia e mātou, i runga i te whakāro o te taetanga mai o te waka o Tainui ki tēnei, ki te Raki Pae Whenua, tēnei te take ka tautokohia mātou katoa, ngā mana whenua katoa, te īngoa nei.”

He kaupapa anō tēnei kua tutukihia e ngā ringa mau whao o ngā iwi manawhenua, arā Ngā Whao Tapu o Tāmaki Makaurau, he mea nui ki a rātou kia whakairohia ngā hītori tūturu o tēnā rohe, o tēnā rohe, hei māramatanga mō te katoa, ka whakauru atu mā raro i te pare nei.

Ki tā Rewi Spraggon, “Ko ngā kōrero i runga i te pare nei, e hopu ana i ngā kōrero, ngā maunga o te rohe nei, Maungauika, Takarunga, Takararo, e pā ana tētahi o ngā kupenga, ngā Moutere o te whanga nei, ko te īngoa tūturu, ko Ngā Poito o te Keretū.”