I hīkoi a Ngāti Manu mo te awa o Taumārere

Dean Nathan
  • Te Tai Tokerau

Kia hoki ai te mauriora ki te awatapu o Taumarere.  Koinei te whakahē a te iwi o Ngāti Manu ki te whakahau kia whakawhānuingia te tauranga waka ki Opua. 

I te rā nei ka hikoi rātou ki te tuku i tō rātou pānui ki te kāwana me ngā kāwana-a-rohe i mua atu i te kawenga o tēnei take ki te kōti taiao.

Ko Otuihu te pā i titiro iho ai a Pomare ki runga o Taumarere.  No te rā nei te poroteihi a ngā uri mo te maurimate o tō rātou na awa tapu.

Hei tā Arapeta Hamilton, “Koina hoki te take ka kī atu mātou ki te kamupene nei, ko mātou ngā kaitiaki o tēnei wāhanga o te awa.  Kahore ōku kaihana o te tuawhenua ngā kaitiaki o tēnei wāhanga, ana ko mātou na.”

E takariri ana a Ngāti Manu ki te pūrongo-ā-iwi mō tēnei take na te ringa taiao tonu o Ngatihine i mahi.

E ai ki a Arapeta Hamilton, “Ara ka whakahoungia rā tou ingoa ki roto engari horekau he mea he whakaaetanga rā a tou iwi a tou hapu.  Koina hoki te mea e tino mōrikarika ana mātou.”

Ki tā Pita Tipene, “Mena kīhai i tika tēna kaupapa ēna kōrero me tirohia ana mena i te hē whakatikangia i te mea ko to mātou mahi he tiaki i tēnei awa”.

No te tau waru tekau mā iwa ka tu tēnei pou ia Ta Himi Henare katahi ka tuku i te tono kereme WAI 49 kia kaua ano te Pakeha e hanga i tētahi kaupapa pēra i te pou herenga waka tuatahi ki Opua. 

I te rā nei ka puta ko te toihau o Far North Holdings Limited ki te tango i tō rātou na pānui.

Hei tā Pita Tipene, “Ehara ko nga kaunihera te kaikōrero mō tēnei awa engari ko ngā hapu anō o ēnei takiwā.  Koia tēna te putake o tēna kereme.  E ū tonu ana a Ngatihine me ngā hapu o konei ki tēna kaupapa.”

E ai ki a Arapeta Hamilton, “Kia hoki ai te mauriora mai i te mauri mate.  Koina hoki tō mātou kī i te rā nei.  He aha tō tātou hiahia, he awa pai he awa ora.  Koina hoki te hiahia o tēnei iwi.”

Hei tēnei wiki tonu tukuna ai te tono pira a Ngāti Manu ki te kōti taiao.