I aukatia te rori o Pipitea kia kore e kuhu ai ngā taraka poro rākau

Dean Nathan
  • Te Tai Tokerau

E hia nei ngā tau te hunga noho ki te rori o Pipiwai e pākinohia ana e te puehu. Nō te rā tonu nei, ka aukatia e rātou te haere o ngā taraka kawe poro rākau ki taua rori, i runga i te tūmanako mā reira e rongo mārika ai ngā mana kāwanatanga ā-rohe i ngā nawe me ngā auē a te iwi mō tēnei take. 

Ko te puehu pai o ngā rori he take kua roa kē e kokiritia ana ki te aroaro o ngā kaunihera o tēnei rohe.

Nō tērā tau ka mau mai he mīhini hei whakamātautau i te mātotoru o ngā puehu e rere ana i te takiwā nō te kitenga ake kei te tūroro haere ngā whānau kei ngā tahataha o te rori e noho ana.

Ahakoa te āki ā ngā pirihimana ki te tuku i ngā taraka kia haere, e mea ana te hunga kāinga, he whenua Māori hoki tēnei pito o te rori.

E mea ana ngā kaiārahi o tēnei kaupapa, e kore e hiki te kapinga o te rori nei ki ngā taraka kawe tūporo kia tatū rā anō o rātou hiahia mō te oranga o te iwi kāinga, te taiao me ngā rori.

Kua roa te hunga kāinga e whakatūpato ana kei kapia e ratou  te rori, ā, nō te rā nei ka oti.