I angitū TKKM o Tuia Te Mātanga i ngā whakataetae kapa haka ā rohe

  • Te Waipounamu

I uru te Kura Kaupapa Māori o Tuia te Mātangi i te whakataetae kapa haka kura tuatahi o Te Tau Ihu o te Waka inakua nei, me te aha, i toa ko rātou.

I toa anō i a rātou te whakataetae o Te Waipounamu whānui, ā, i pōhiritia rātou, me ngā taonga o te whakataetae, ki te wā kāinga i te rangi nei.

He tuatahitanga, kia kotahi te tū mā ia rōpū, ā, i whakawāngia mō te whakataetae ā rohe o Te Tau Ihu me Te Waipounamu i Whakatū, i ngā rā okioki.  I eke pānuku rātou i ngā wāhanga matua e ono.

Hei tā te pouako, Ārana Tamepo, “Harikoa ana ngā whānau, te hapori anō hoki.  Āhua ohorere rātou i haere mai rātou ki te tū ā kākahu me te āta whakaaro ake kāore pea ngā tamariki i eke i tērā wā, engari tae atu ki te rangi, au, ka ohorere, ka tumeke, ka mīharo, nō reira, harikoa ana rātou.”

Ki tā te Tumuaki, a Lara Wharerau, “I tū te ihi, tū te wehi, tū rangatira ai ngā tamariki i runga i te aroaro o te minenga.  I puta te taniwha i te ana, kia rangona e te katoa, ā rātou nei mōhiotanga.”

I ngā tau e whā ki muri i whakatū ai te kura kaupapa Māori kotahi o Whakatū.  Ko te whakahōnore i ngā iwi e waru o te rohe te ito o ngā mahi ā rēhia.

E ai ki a Tamepo, “I nuku atu mātou, tono atu mātou ki te haukainga kia tuku mai rā ngā kōrero o tērā iwi, o tērā iwi.Kia pupuri rātou i ērā kōrero o konei.”

Ko Sonaia Beard tērā e mea ana, “I haere a tīnana atu te kura katoa ki ēnei wāhi i waiatahia e rātou.  I kite ā karu, i rongo ā wairua, i whakarongo pīkari atu ki ngā pūrākau ā tēnā ā tēnā o te haukainga.  Mā tēnei tūāhua ka whai marama ai rātou, kia ora ai ngā waiata i waiatahia nei.”

He mea kaingākau ngā kōrero tuku iho nei ki ngā kaihaka

Ko Te Kura Kaupapa Māori o Tuia te Mātangai tētehi o ngā kapa tau hou ka tū ki te whakataetae o Mana Kuratahi ā tērā tau, ki Tūranganui a Kiwa.