Ngā kaupapa: Entertainment, Te Reo Māori

Howraki pronunciation could be corrected come December

By Talisa Kupenga
  • Tāmaki Makaurau

I hui ngā māngai o Pare Hauraki me ngā kaimahi o NZME ki te whiriwhiri i te whakahuanga tika o te ingoa o te reo irirangi o Radio Hauraki.  Ko tā te māngai o Hauraki, ko tā Korohere Ngāpō, ko te kaupapa o te hui he whāngai atu i ngā hītori o te iwi me te tikanga o te ingoa Hauraki, ā, he aha ia rā te take me tika tōna whakahuanga. 

Ahakoa ko te tauhokohoko te kaupapa, ko te hē mai o te whakahua kei te ngau tonu i te taringa, heoi ka rerekē pea tērā hei te marama o Hakihea.

Ko tā Korohere Ngāpō, māngai o Pare Hauraki iwi, "I huri atu a Dean Buchancan, nānā i ki mai ki au i roto i ēnei marama e haere ake ana, ka noho ano ratou ki te rekoata i te kupu hauraki na reira. Hei te marama o Hakihea ko tona tikanga kua puta katoa te whakahua tika."

I hui ngātahi a Pare Hauraki iwi ki nga kaimahi o NZME ki te whiriwhiri ara whakamua mō te whakahua tika i te ingoa o Hauraki. I te marama o Hurae nā tētahi kaimahi o mua i puhi te whio, ko tāna nā NZME te whakahau me hē te whakahua a ngā kaimahi i te ingoa mō te tauhokohoko te painga.

Hei tā Ngāpō,"I whoatu ētahi hitori ki a rātou i whai wā rātou ki te pātai, i whai wā rātou ki te whakarongo ake. I kitea e au te pono i roto i a rātou, na rātou i ki mai ki au ka hiahia rātou ki te whakahua tika i te kupu Hauraki."

Kāore a Dean Buchanan no NZME i wātea ki te kōrero ā-kāmera mai. Ēngari ko tāna e whakarite rautaki tonu rātou ki te taha o ngā momo rōpū ki tēnei take, ā, kāore he kōrero atu i tēnei wā.

Ko tā Ngāpō, "kei te mōhio rātou inaeatonu nei mehemea ka puta hē rawa atu te kupu Hauraki ka tino mamae nga iwi katoa o Pare Hauraki. Na reira koinei pea te mea nui ki au. No reira ki au nei, he ahunga whakamua tēra."

Kaore ano kia whakarite he rā wānanga reo mo ngā rōpū, ēngari i tēnei wā ko te whakarite rautaki whakamua te mahi. Ko tā Ngāpō whakapae ka hui ano rātou i mua i te mutunga tau, ā, mena he karanga āwhina kei te haere kei reira rātou hei ringa kaitautoko.

Tuaritia: