Horo rawa te kī a te minita take tiriti kei te karauna tonu te mana whakahaere

Dean Nathan
  • Te Tai Tokerau

Pepehatū ana a Ngāpuhi ki ngā kōrero a te Minita Take Tiriti, a Chris Finlayson, i whakakahore i te pūrongo tuatahi a te taraipiunara o Waitangi mō te kēreme a Te Paparahi o Te Raki.

E ai ki te pūrongo i puta i te Rāmere, karekau a Ngāpuhi i tuku i tōna tino rangatiratanga ki te karauna, ā, ko tā te Minita, he whakatau tē aro i te kāwanatanga.

E hari ana a Ngāpuhi ki te whakatau o tēnei pūrongo, engari horo rawa te kī a te minita take tiriti kei te karauna tonu te mana whakahaere.

E oho pai ana te mema pāremata o Te Taitokerau ki te kī a te minita, horekau kē he rerekēnga āmuri i te te putanga mai o tēnei pūrongo.

E ai ki a Kelvin Davis, “E āhua āwangawanga ana ōku nā te minita tā tōna tere kia whakakorengia tēnei whakatau o te taraipiunara. E mōhio ana au he aha ai ia i kōrero pēnei rawa ai. Hei whakatau i ngā āwangawanga o ngā kaki whero.”

E kore e kahore ka haere tēnei purongo hei kinaki i te nohohanga ohorere a te taraipiunara o Waitangi hei tērā marama ki te whirirwhiri i ngā whakahaere a te karauna i tohua ai ko te rōpu o Tūhoronuku hei mana whakatatu i ngā kereme o Ngāpuhi i tōna kitenga ake, he mahi whakatoihara te taea e ngā hapū te hoki whakamuri.