Hōhā ana tētahi kainoho nō Horowhenua Rohe ki ngā kupu taurangi a te Karauna e pā ana ki te kounga o te wai

  • Te Whanganui-ā-Tara

E ai ki tētahi kainoho i roto o Horowhenua Rohe, he iti te pūtea a Nāhinara ki te whakapai ake i ngā wai o taua takiwā.

Kua roa a Phil Taueki e pakanga ana mō te oranga o te roto.

Hei tāna, e ohorere ana ia ki te kōrero maminga i puta mai i te waha o te minita. Ko tō rātou aronga ki te roto e tohu ana i ngā whakaaro anuanu kino hoki o te Karauna ki ngā hiahia o te iwi Māori kia tiaki i tō rātou taonga.

Ahakoa te kino kua pā atu ki te roto, hei tāna, kāre te kāwanatanga i te whakatikatika i tēnei take.

E mea ana a Phil Taueki, ko ngā parawai, ngā parakaingaki, ngā para pāmu nō te taone o Taitoko ka rere tōtika atu ki te roto. Me maumahara tātou katoa, ōtira ko koe Nick Smith, he roto tumataiti tēnei.

E ai ki te Tumuaki Takirua o te Rōpū Kākāriki a James Shaw, he iti noa iho te 44 miriona tāra ki te whakapai i ngā wai hurinoa i te motu, ā, kua kite kē ia i ēnei kōrero i a Nick Smith i ngā tau kua pahure.

Hei tāna, ko te painga atu kia kaua e whakaparuparu i te tuatahi. Ki te pērā, e kore nei tātou e whakapau miriona tāra hei whakaora ake i te roto, ka mutu, ka utangia tērā utu ki ngā kaiutu tāke kāore ki ngā kaiparuparu nā rātou te mahi paruparu nei.

Ahakoa kāre a Taueki rāua ko Shaw i te whakaae ki te kaupapa whakatika i te wai a Nāhinara kei te aro kē rāua ki te kaupapa a Reipa.

Hei tā Taueki, he tino pai te kite i te whakapuaki kaupapa here i puta mai i a Reipa inā tata nei e whakaae ana ki ngā mōtika a te Māori. Ko te mea kē ēhara nō tētahi te wai ēngari nō tātou katoa te kawenga ki te tiaki i te wai.

Hei tā Taueki, ki te kore te kāwanatanga e whakatikatika ana i tēnei take ka aukatihia e rātou te wāra ki te tiriti o Kuini.