Hoani Waititi marae welcome back Wehi whānau

  • Tāmaki Makaurau

Kua haka pōwhiri mai te whānau Wehi ki runga i te marae o Hoani Waititi, i te uru o Tāmaki Makaurau i te rā nei.  E ai ki a Ngahiriwa Tai Tin o te kapahaka Taha Tū, tōminamina ana ngā kaihaka i Tāmaki kia whai wāhi ki te whakanui i te mūrau o te matatini, i a tākuta Ngāpō Wehi.

He tohu o te aroha ki te iho pūmanawa i ngā mahi ā rēhia me ngā haka a tānerore. Me te kiri mate o te whānau Wehi e rongo tonu nei i te kākahu taratara o mate.

Hei tā Tai Tin, “Ko te whakanui i a Ngapo, anō nei tōna wahine, me te whakahoki mai tōna iwi ki te ao Māori, ki te ao mārama, ki roto i a Tāmaki.”

E ai ki te Tumuwhakarae o Te Matatini a carl Ross, “He karanga aroha mai ki a mātou, nā te mea ko wētahi o ō mātou mokopuna, ngā mokopuna o Ngapo rāua ko tōna hoa e noho mai i roto i tēnei kohanga reo, i roto i tēnei kura me te Whare Kura.” 

Tōna rua wiki ki muri i mate ai te rangatira nei o Te Waka Huia, nō Te Whakatōhea, Ngāi Tūhoe, i ngā tōimahatanga o te māuiuitanga.  Hei tohu whakamānawa, i tukua te tohu taonga o Duncan MacIntyre e te kapa o Te Whānau-ā-Apanui ki te whānau Wehi.

Hei tā te mangai o te whānau Wehi a Muriwai Ihakara, “Kei te whiriwhiri tonu, kei te kōrero tonu te Whānau me ngā iwi.  Ka whakaritehia tētahi wāhi e ahei ai te whānau ki te whakahoki atu, i te taonga rā, ki te wāhi e tika ana.”

Me te īnoi kia hanga i tētehi tohu taonga hou i Te Matatini, kia tapaina e te ingoa Ko te Ngāpō me te Pimia Wehi Memorial Trophy.

Hei tā Ihakara, “Mā te heamana o Te Matatini tērā e kōkiri i te tuatahi, kia whakatauhia e rātou kātahi ka tae mai te tono ki te whānau, kāore anō kia tutuki.”

Hei te taite e tū nei, hari ai Te whānau Wehi i te kawe mate o tō rātou Pāpā ki ngā whakanui i te Koroneihana tuangahru mō Kingi Tuheitia, ā, hei te Rāhoroi ka tū ngā kapa katoa o Te Waka Huia ki te whakangahau i te marea.