Hoani Waititi Marae under-resourced to tackle homelessness says manager

  • Tāmaki Makaurau

Hei tā te kaiwhakahaere o Hoani Waititi Marae a Shane White, e noho ana tētahi tangata horekau kainga ki roto i tō rātou rūmā matarihi.

Ahakoa i te nuinga o te wā, e kore te marae e karanga atu ki te hunga kore kainga kia noho mai ki te marae, hei tā White, ka ngana tonu rātou ki te tautoko i te hunga nei.

Ko Hoani Waititi Marae tētahi o ngā taumarumaru mō ngā iwi noho taone ki Tāmaki.

Hei tā te paearahi o te Marae a Shane White, ka tāwharau ētahi o āna kaimahi i te hunga whakaraerae.

E ai ki a White, “Ka pērā hoki mātou, ehara i te mea ka whai rauemi, tangata, waahi hei tiaki, nō reira ka haria ki ō mātou kainga, pērā ki tō mātou whare tiaki i raro i te ahi kā, tēnā pea tokotoru ngā whānau i noho ki reira i tēnei tau.”

Hei tā White, e whai whakaaro ana rātou mō te hunga kore kainga, ēngari e kore e tāea e rātou te whakanoho i te hunga nei ki te marae, nā te nui hoki o ngā kaupapa e whakahaeretia ana ki reira.

E ai ki a White, “E kore e mutu, e kore e kapi, nō reira e kore e tāea te whakawātea i te whare tupuna hei whare moe mā rātou, ahakoa he tautoko tonu ki tētahi i roto i ngā whare o ngā kaimahi. Ki te marae nei, nā te mea he kura, he kōhanga reo, he kapa haka anō hoki e mahi ana ki runga i te marae, e kore e whai wā.”

I tērā wiki tonu, ka takoha kai atu ētahi ki te marae ki te hāpai i te hunga pōkaikaha.

E ai ki a White, “E mohio ana mātou wētahi o rātou. Kei konei tētahi e moe ana ki tō mātou whare moenga engari, kua haria atu ki roto i te hapori e o mātou kaiarahi, o mātou kaimahi, whānau awhina, i te mea, mohio ana rātou ki ētahi e tino noho taumaha ana, etahi e whai kainga ana engari karekau he kai kei roto i te kapata.”

Hei tā White, ka whai waahi atu rātou ki te tunu i tētahi hangi mō te hunga kore kainga ā tērā wiki.