History lessons for Hoani Waititi students in Rarotonga

updated
  • Tāmaki Makaurau

E rua rau, e rima tekau ngā tauira, ngā kaiako me ngā mātua o Te Kura Kaupapa Māori o Hoani Waititi kei te whai i ngā tapuwae o ō rātou tīpuna i Rarotonga, i mua i te hekenga o te Māori ki Aotearoa i ngā rau tau ki muri.

E ngana ana ngenei ākonga o te kura kaupapa Māori o Hoani Waititi ki te whai i ngā tapuwae o ō rātou tūpuna.

Hei tā te Amorangi Mahuri o Wharekura Hoani Waititi a Peata Leef, ‘Kia whai wheako te kura nei ki whenua kē, heoi anō kāore he wãhi tūa atu ki ngã moutere i haere ai ō tãtou tūpuna, nō reira i tau te whakaaro ki Rarotonga.”

“E tino hīkaka ana ahau, nā te mea ko tēnei tōku wā tuatahi ki te rere atu ki tāwāhi,” hei tā Paratene Martin.

“Hīkaka ana te ngākau, i te mea kei te haere mai ōku hoa,” hei tā Tomairangi Hetaraka.

E ai ki a Leef, “He nui ngā wheako ka whai hua mā ngā ākonga, ko te reo te tuatahi ki a mātou me ō rātou tikanga whakahaere i ngā tāngata taketake o te whenua rā. Ko te titiro ki te wāhi te taunga o ngā waka a ō tātou tūpuna, te rongo i te hā o te whenua.”

Tōna kotahi tau me te hawhe te kura i whakatau ai ki te haere atu ki Rarotonga.  Mai i taua wā, i whakapau kaha te kura me ngā whānau ki te kohikohi pūtea.

“He nui ngā kaupapa i ngāna mātou te penapena pūtea, e hia ngā hāngi, kua whāngaihia i te hapori nei,” hei tā Leef.

Nā te nui o te tira haere, āpōpō wehe atu ai ngā tauira, kaiako me ngā mātua o te Kura Takawaenga ki Rarotonga, hei te Rāhina haere atu ai te Kura Teina Tuatahi.