Ngā kaupapa: Housing, Te Arawa

Hikoi mo te hunga noho kore kainga

Mere McLean
  • Waikato/Te Waiariki

Ko te tūmanako o ngā kaiwhakahaere o te hīkoi ma te hunga kainga kore i Rotorua ka tū tētahi whare i ngā pō mo taua taone. Kua kotahi atu ngā tāngata kotahi rau neke atu ki taua tāone mo te hīkoi pēnei i ngā mema o te rākau whakamarumaru me ngā pirihimana. Ki tā te kaiwhakarite i te hikoi a Renee Kiriona o te rōpū Pouhine ki te Whainga, “kāre i te mahana haere, e hia nei ngā marama kua tuku reta, īmera me te whakatū hui auware ake nō reira i tēnei rā kei te hikoi mātou”.

Atu i te manawa o te taone ki te aroaro tonu o te tari o Te Hiranga Tangata rere ai te karanga, engari ki tā Tamati Coffey, he whakautu poto noaiho tērā, ā, me kimi kē he rongoā mō tua. “Ko ngā whare i te tuatahi tētahi kaupapa kua whai pūtea mai i a mātou ki Rotorua nei, kātahi anō kia timata, ā, ka ahua tōroa engari mōku ake ka nā ngā ahau ki te mahi tahi me te kaunihera, te iwi, te hapori ki te hapai i te kaupapa mo te Takurua”. E ai ki ngā kaiwhakarite o tēnei hikoi neke atu i te ono tekau ngā tāngata e noho kore kainga ana ki te puku o te taone.

Ki tā Merepeka Raukawa-Tait, kaikaunihera mo Rotorua me aro ka tika, te kaunihera. “I tēnei rā kua rongo ahau i te karanga kia whakatika i te raru nei, kei roto a tātau tāngata i te makariri, kei te moe ki waho kāre tērā i te tika kāre au i te hiahia kia noho noa tātau”. Ko te whakahau mai te rōpū o Ngā Pouhine ki te Whainga he whare kei te wātea ki raro i te kaunihera mo tētahi whakaruruhau engari ko te kaunihera ka whakaritehia e rātou tētahi whakatewhatewha mehemea ka tāea te whakarite i tērā whare hei whakaruruhau.