Hei whakaora ake anō i ngā wairua a ō tātou tamariki

Wepiha Te Kanawa
  • Tāmaki Makaurau

He mataku tonu rā te kite atu i ngā pākarukaru rererangi me te taraka patuahi ki te wāhi kotahi, hēoi, mō ēnei tamariki he kaupapa whakahiato ora kē tēnei.

Hei tā tētahi o ngā kaiwhakahaere o te taiopenga nei, arā, he kaitaraiwa hoki mā te kamupene waka tono Corporate, tā Noel Knight e mea ana “kua toru tau tēnei kaupapa e tū ana, ā, koinei te hui tuatoru. Ko te tuatahi i tū ki te whare kararehe o Tāmaki, ā, kua rua ngā hui ki te taunga wakarererangi nei.”

I pōhiri mai ngā tamariki kua pā kinotia e te mauiui puta noa i te motu ki tēnei kaupapa.

E ai ki a Noel e mea ana “Ko ngā mahi a ngā tamariki he mau pōtae māro me te uru atu rātou ki ngā waka patuahi. Hēoi anō rā, i whai wāhi atu ngā taurikiriki ki te whakamahi i te pū wai, me te mea anō hoki he rangi tino miharo mō tēnei hunga, i whai wāhi hoki rātou ki te mahi i ētahi mahi e kore rawa e wātea ai kia rātou i muri iho”

Kua ngaua a Caesar Nepia he tekau mā toru tau te pakeke e tētahi mauiui kai i te kōiwi e kore e tino kitea, koia tētahi o ngā tamariki waimarie i tae ā-tinana atu.

Hei tā ngā mātua o te poai nei, tā Te Aroha Rangi rāua ko Harry Nepia, nō Tainui “Kua ono marama kia whakatauria rawatia he aha te māuiui ki a ia, ā, he māuiui kaikōiwi kē e ngau nei i a ia. I taua wā hoki e rua noaiho ngā tamariki i Tiamani i hinga atu rā i tēnei māuiui.”

Hei tāpiritanga atu “I taua wā ko Caesar anahe anō e rongo ana i tēnei mauiui i tēnei tūakoi o te ao, nāreira i te hanga uaua i ētahi taima.”

Ko ētahi o ngā rongoā i whakapiki ake ano ai i tōna oranga, ētahi o ngā ingoa o ngā rongoā i kūpenga whīwhiwhi ai te arero, he rua tekau mā rima reta tōna nei roa, hēoi anō rā!”

Heoi anō rā, ahakoa ngā taimahatanga kua pā nei ki tēnei whānau i roto i ngā tau, kua wetewetehia ngā here ki te aikiha e tēnei kaupapa nui whakaharahara.