Kaupapa: Tūhoe

Hei te tau hou rānō te tatari kia takahi anō te hunga aru kararehe i Te Urewera

Mere McLean
  • Waikato/Te Waiariki

Hei te tau hou rānō te tatari kia takahi anō te hunga aru kararehe i Te Urewera kia oti te arotake o te poari hōu i ngā raihana. 

He tūāhua tēnei e whakatipu ana i te āmaimai ki roto i te hunga whakangau, engari ko te whakahau mai te heamana o te poari he mahi tēnei kia tiro ki te haumarutanga hei painga mā te hunga whakangau. 

Kei raro Te Urewera i tētahi poari hōu, ko ngā mema nō Tūhoe me te Karauna.  I tēnei wā kei te tiro rātou i te huarahi tuku raihana.

Hei tā te heamana a Tamati Kruger, “Ko te kaupapa o ngā raihana kei te tirohia anō, kei te arotakehia anō e te pōari o Te Urewera.”

Ngā raihana kua tūkuna e Te Papa Atawhai i mua i te whakatūtanga o te poari o Te Urewera kua kore he mana. 

E ai ki a Kruger, “He nui rawa ngā hapa me ngā hē kei reira, nō reira kua puta te pānui tērā pea e rua marama, ka hiahiatia ki te tirotiro ki te whakamāia ake i ērā raihana.”

Engari ko te whakahau a ngā māngai o Tūhoe he whakakaha ake i te pai me te haumarutanga o te mahi aru kararehe noaiho te whai. 

Hei tā Kruger, “Me te mōhio anō ka whakapōrearea ētahi e haere ana ki te whakangau poaka ki te hopu tia engari mō te painga tēnei nē.”

Kua mutu te tuku raihana i raro i Te Papa Atawhai mō Te Urewera, ā, mo te poari o Te Urewera tonu kia mahi tahi me ngā rōpū kia kite ake he hua ki roto i ngā marama e rua te aro.