Kaupapa: Prison

Hei tā tētahi kaikawe kaupapa Māori me whakahaere ngā iwi i ngā Whare Herehere

  • Tāmaki Makaurau

Kua takoto te manuka i te kaikawe kaupapa Māori o mua o Te Whare Herehere o Maungawhau a Hemana Waaka me te kī ake, ka tāea e ngā iwi Māori te whakahaere i ngā Whare Herehere o te motu.  Hei tā Wāaka, ka tāea e Ngāpuhi, e ngā Mana Whenua o Tāmaki Makaurau, e Ngāti Kahungunu te whakahaere i ngā Whare Herehere kei roto i ō rātou ake takiwā.

Ko tā Waaka me aro mai te Kāwanatanga ki te whakarongo ake ki ngā hiahia o ngā iwi Māori, kia whakahaere i ngā whare herehere matua.

Ki tā Waaka, “He aha te rerekē o te poipoi i te kōhungahunga i roto i ngā kōhanga, ki te poipoi i ngā mauhere i roto i ngā whare herehere.  Ināianei whakahokia mai te mana rangatira mā ngā iwi hei whakahaere i ngā whare herehere o Aotearoa.”

Hei tā te kaiārahi takirua o Te Pāti Māori a Marama Fox ka whakatēpungia e ia te whakaaro ki mua i te aroaro o te Minita Ara Poutama.

Hei tā Fox, "Ki au nei ka taea e Ngāti Kahungunu, kei reira o rātou uri e mahi ana i roto i te whare herehere i konei, nā reira he tīmatanga tēnei."

I tūmanakotia e Pita Sharples, te Minita Ara Poutama o tuarua o mua, kia whakatū whare herehere Māori motuhake mō te Māori tonu.

Hei tā Waaka ka tāea e ngā tikanga Māori te toro atu ki ngā iwi katoa, hakoa Māori mai, iwi kē mai rānei, ā, e kore hoki te whakaaro nei e tukua tuatahitia atu ki te motu.

E ai ki a Waaka, "Tērā pea he pai ake mā te iwi anō e manaaki i ngā mauhere i raro i o tikanga me a tātou nei ture"

Ahakoa kei te tamarikitanga tonu tēnei whakaaro, ko tā te Pāti Māori ka kawe ake rātou i te whakaaro me te mea hoki rā kua hui kē atu rātou me ētahi o te hunga Māori e mahi ana ki rō whare herehere.