Ngā kaupapa: Elections, Politics

Hei tā nga tatauranga e tautoko ana Te Tai Hauāuru i te hononga a te Pāti Māori me Nāhinara

  • Te Tai Hauāuru

Ko te ihu o te Pāti Māori kei mua e haere ana i roto i te whakataetae nui mō te rohe pōti o te Tai Hauāuru.

Kei muri e whai tata atu ana mā te toru ō-rau noa iho, ko te kai-tono o Reipa. Tūturu, he pakanga mō te hemo tonu atu kei te haere. 

E ai ki ngā rangahau tatau pōti a Whakaata Māori, e toru tekau mā rua ōrau i tuku pōti ki a Chris McKenzie. E rua tekau mā iwa ōrau ki a Adrian Rurawhe, kātahi ko Jack McDonald o ngā Kākāriki, kei te tekau mā tahi ōrau e noho ana. Ka mutu, ko Jordan Winiata o MANA e tau ana i runga i te tekau ōrau.

He tekau ō rau te rahi o te hunga pōti kāre anō kia tau o rātou whakaaro, ā, e waru ōrau kāore mō te aro ki ēnei kai-tono, kāore rānei mō te tuku pōti.

Ki ngā tatau pōti ā-pāti, e toru tekau mā ono ōrau tā Reipa, e rua tekau mā toru ōrau tā Te Pāti Māori, he tekau mā rua ōrau tā Nahinara, he tekau mā tahi ōrau tā Ngā Kākāriki me Ipurangi MANA, ā , e whitu ōrau te tautoko ki a Aotearoa Tuatahi.

Ko tētahi o ngā raru nui mō te Pāti Māori he kaupare, he whakatika rānei i ngā pōhēhē me ngā whiu a te tokomaha o Ngāi Māori mō tāna mahitahi ki a Nāhinara.

E ai ki nga tatau pōti i a whakaata Maori, mena i te pāti Māori te mana tohu i te kāwanatanga kei te hiahia a te nuinga kia piri tahi ia ki te rōpu Reipa.

Heoi e ai ki ngā tatau uiui a Whakaata Māori, ki te wikitoria i a Nahinara te kōwhiringa pōti, e ono tekau mā whitu ira whā ōrau e hiahia ana kia noho te Pāti Māori ki tēnā tēpu kāwanatanga.

Kāti hei te rua tekau o Hepetema kite ai pena he whānui tēnā tautoko, pena rānei ka utu te Pāti Māori i te nama o taua hononga.