Kaupapa: Crime

Hei tā Kelvin Davis kei te rūkahu te Minita Ara Poutama

Te Kāea
  • Tāmaki Makaurau

"Kei te rūkahu te Minita Ara Poutama."  Koinā te whakahau a Kelvin Davis, te kaikōrero Ara Poutama o Reipa, i muri mai i te whakatau a te Minita, kāore ia i paku rongo kōrero mō ngā rōpū whawhai ki rō whareherehere, tae noa ki te wiki kua hori. 

Kei te rere ngā patu ki rō whare herehere, engari, ko te whakawhiu kaha, nō ngā ngutu o Kelvin Davis.

Ki tā Davis, “E rūpahu ana!”  Koinā tā Davis, mō te whakatau a te minita Ara Poutama, kāore ia i paku mōhio, he mahi whakarite whawhai i te kōkiritia, ki te whareherehere o Maungawhau.

Hei tā Davis, “Kāore au e whakapono ana ki ngā kōrero a te Minita, i te mea i tēpūngia taua rīpoata, kua whakamanahia e ōna āpiha, nōreira ko te mahi o ana āpiha he whakaatu i tērā ki te minita.”

Kua puea ake tēnei take, i muri mai i te whakaputanga o ngā whaiwhai ki rō whare herehere ki runga ipurangi.

Hei tā Davis, he mahi huna kei te haere.

E ai ki a Davis, “Mēnā e kite ana te motu whānui, e pēnei ana ngā mahi a Serco, e tuku ana i ngā karapu whawhai te haere tonu, kei te mōhio te motu whānui, he koretake a Serco, me oti.”

Ko tāna, kotahi noa te hua tika.  “Me rihaina te minita, me rihaina tana tumuaki, me rihaina ngā āpiha.”

Kāore te minita Ara Poutama i hia whakahoki i ngā whakawhiu a Kelvin Davis ki runga kāmera, ēngari i tuku kōrero ia ki a mātau, me te kī kaore ia i te rūkahu, ā, i rongo ia i ēnei kōrero nanakia, i te wiki kua hori.

Hei tā Lotu-liga, kei te āta aruarutia ngā mahi a Serco, i tēnei wā tonu.