Kaupapa: Business

Hei tā Air New Zealand ka whakakorehia ētahi o ngā ratonga ā-rohe

Mere McLean
  • Waikato/Te Waiariki

Ko te whakahau mai a Air New Zealand ki te hunga kaiutu tūārangi e whakamahi ana i o rātou waka rererangi mai Whakatāne kei te whakakorehia ēnei waka nā runga i te utu.  

He kōrero tēnei ka whai ake i te whakatau i puta inanahi nei ka whakakore ētahi o ngā ratonga ā rohe hei te mārama o Paengawhāwhā o tērā tau.

He wairua mokemoke i te waka tauranga rererangi o Whakatāne i te rā nei, whai muri i te whakatau inanahi a Air New Zealand, ka whakakorehia ā rātou rerenga mai i tēnei wāhi hei te mārama o Paengawhāwhā o te tau hōu.

Mō ngā kiritaki pēnei i a Harata Day, ka rere ake mai i Whakatāne ki Tāmaki Makaurau ia wiki, na te īmera i mōhio ia ka pēneitia rātou.

E ai ki a Day, “Ohorere katoa au nā te taenga mai o te īmera a Air New Zealand inanahi, te ahi o nanahi nei ki te kī mai he nui te wāriu o te tangata ki a rātou engari, anei ngā kōrero, kua kore e rere ngā waka rererangi mai Whakatāne ki wiwi, ki wāwā, kua katia tērā.”

Ko ētahi atu o ngā wāhi ka raru, ko Taupō, Kawatiri, Te Papaioea ki Whakatū me Whangarei engari i roto i te pouri he mārama ka puta mō Te Tai Tokerau.  

Nuku atu i te rima tekau mano te hunga kei Te Moana a Toi e noho ana.  Ki tā te koromatua o Whakatāne tā Tony Bonne he mahi tēnei e haukere nei i te rohe.

Ki tā Kelvin Davis, “Hei aha te pukuriri ki a Air New Zealand, harikoa ahau kia rongo tētahi kamupene anō a Sun kei te hiahia rātou, kia haere tonu ngā haerenga ki te wāhi taunga rererangi o Kaitaia.”

Ki tā Air New Zealand he mahi whakaheke utu tēnei, engari mō te waka tauranga rererangi o Whakatāne kāre ano rātou kia tuohu noa.