He whetu maiangi a Teneti i ngā Hākinakina e toru

James Perry
  • Te Tai Rāwhiti

Inā ngā pūmanawa hākinakina tō Kelsey Teneti o Tūranganui a Kiwa. He toa Waka Ama, he toa whutupōro anō hoki. Heoi ko te haupoi tērā e whitawhita nei i tōna ngākau. 

E whai haere nei a Kelsey Teneti i ngā tapuwae o tōna whānau kua roa e kaingākau ana ki ngā tūmomo hākinakina. Hei tāna, he rongonui tōna whāea, a Louise i te ai Haupoi, e tākaro tonu nei. He toki whutupōro, he kaimamau Judo anō hoki tōna pāpā a Kelvin. 

Nō te wiki nei riro i a Teneti te toa whakaihuwaka whutupōro kōtiro U15 mō te rohe o ngā Hurricanes. He whakataetae i angitu hoki tōna kapa nō te kura o Rītana. Ka mutu ko ia anō tētahi o te tira Waka Ama i tae atu ki ngā whakataetae a Ao ki Tahiti. I reira kapohia ai e ia ngā mētara kōura e whā, e whakatū rīkoata hou anō hoki mō tōna karapu, mō Horouta.

Inā ngā huarahi e puare nei mō Teneti hei ngā tau e heke mai nei, ā e kata nei ia ka whai haere ia i te pūtea, nā ka riro pea ia ki te whutupōro. Heoi, kāore ia mō te aropū ki te hākinakina kōtahi.

Heoi anō ko te aronga mōna ko te whakatinana i ngā moemoea haupoi o tōna whaea. He hiahia nōna ki te eke ki ngā taumata teitei, ka mutu ki te tutuki anō i ngā whakaritenga o tōna whaea.

Inā te nui o tōna aroha ki te hākinakina, ki te kore ia e eke ki ngā taumata hei kaitākaro, ka whai tonu ia i tētahi ara e hāngai tonu ana ki tēnei ao. E ngākaunui ana ia ki ngā mahi kai, e tiro hoki ana ia ki ngā mahi kōmiri.

Haupoi mai, whutupōro mai, Waka Ama mai, me uaua ka kore a Kelsey Teneti e eke ki ngā taumata e hiahia nei.