Kaupapa: Treaty Settlements

He whenua kei raro i te kereme o Patuharakeke iwi kei te hokona ā-ipurangi atu

Dean Nathan
  • Te Tai Tokerau

Kei te takariri te iwi o Patuharakeke ki te hokotanga o tētahi whenua kua oti noa te whakataha hei whakahoki ki a rātou a tōna wā.

Kātahi anō te Taraipiunara o Waitangi ka tīmata te rongo i ngā kereme o Patuharakeke mō te rironga o Poupouwhenua, nō te aranga tae mai te karere mō te hokotanga o ngā whenua neke atu i te kotahi rau e ono tekau heketea ki tāwāhi mā te ipurangi.

Hei tā Jared Pitman, "Ka tae te rongo ki a mātou, kātahi ka riri ka riri i te mea ka mōhio mātou he whenua tēnei kua whakatahangia ki te hoki mai ki te iwi a tōna wā.  Nā reira, e āwangawanga ana mātou i te mea kua tukuna ki te ao whānui hei hoko i tō tātou nei whenua."

He poto te wā ki ngā roia o te iwi ki te rapu huarahi hei aukati i te hokotanga a Mighty River Power, me te mōhio kei te Karauna te nuinga o ngā pānga o tēnei kamupene, nā reira te hiahia a Patuharakeke kia hui rātou me ngā Minita a Chris Finlayson rāua ko Tony Ryall.

Ki Poupouwhenua, kua tata pau katoa ngā whenua o Patuharakeke te tango e te Kāwanatanga hei mahi hiko.  E mea ana te iwi nā te mea kua mutu te mahi hiko ki tēnei pito, e tika ana kia whakahokia ki te iwi nō rātou tūturu tēnei whenua.

I roto i ngā whakahoki a te Tari o Chris Finlayson ki te iwi e mea ana pēnā horekau ngā hapū o Ngāpuhi e wehe ana mō te ara hei whakatatu i o rātou kereme tiriti, kua whai wāhi ai rātou ki te hoko i ngā pānga o Mighty River Power kua tukuna e te Kāwanatanga ki te mākete. 

E mahue ana a Patuharakeke he iwi kua kore ōna whenua i ngā raupatu a te Karauna.