Ngā kaupapa: Housing, Welfare

He whare whakakotahi ratonga i Te Uru o Tāmaki

  • Tāmaki Makaurau

He moemoeā na ngā pou o Waipareira i ngā tau waru tekau o tera atu rautau, kia hikina te hauora o ngā whānau Māori katoa o te rohe, heoi ko te hanga o te Whare Whānau Ora, te whakatinanatanga o taua moemoeā.

Hei tā John Tamihere, “Ko te kaupapa kei konei mō te Whare Hauora o Waipareira te tohu mō ngā tipuna, rātou o Waipareira whānui kei te moemoeā i taua wā, te kōrero i kōrerotia e Uncle Haki Wihongi, Aunty Tuini Hakaraia, ko Don Rameka, Aunty Mavis Tuoro, mō ngā tipuna, rātou e takoto ana i te kaupapa a Waipareira, te whakatauaki a tātou whānui, Kōkiri i roto i te Kotahitanga.”

E rima ngā taumata o tēnei whare, neke atu i te whitu tekau ngā momo wāhanga e tohatoha ana i ngā ratonga ki te iwi whānui o Waipareira, he whare hauora, he tākuta, he whare hoko rongoā, ā kei konei anō ētahi ratonga ka whakahaerehia e te Poari Hauora o Waitematā, hei whakatata atu i ngā āwhina ki te iwi kāinga.

Kei konei anō ngā tari matua o Te Pou Matakana, me Hapai te Hauora, ara noa atu, ara noa atu.

Ko Te Whānau o Waipareira, he hononga anō ki te Rōpū o NUMA (National Urban Māori Authority), ā, kua roa ēnei rōpū noho taone e tautoko ana e āwhina ana i tō tātou iwi.

Nā reira, e kore e pau ngā mihi a te tūmuaki o NUMA a Willie Jackson mō te pakari me te taikaha o te Whare Whānau Ora, ki te whakakuhu i a ia ki te hāpai i te kaupapa ahakoa kāore e tautokohia a-putea e te Kāwanatanga.

Hei tā Jackson, “Koinā tā mātou tino kaupapa ki te whawhai mō ngā Māori e noho ana i ngā taone, koinā te kaupapa mai te tīmata mō Waipareira me MUMA, kōkiri te kaupapa mō ngā iwi e noho ana i ngā taone.”

I raro i ngā whakataunga o te Hōtaka Anga Whakamua a Te Whānau o Waipareira mō ngā tau e 25 kei mua i te aroaro, i whakarewa i te tau 2013, e whakapae ana a Hone Tamihere, kei mua noa atu rātou e haere ana.

Tuia atu ki ngā moemoeā a Te Whānau o Waipareira mō ngā iwi o te rohe o Waitākere, tērā anō ngā whakamihi a Willie Jackson mō tēnei whare, me tana whakapuaki mai i ōna ake wawata mō ngā iwi o te Tonga o Tāmaki.