Kaupapa: Tūhoe

He whare tawhito kei Taneatua ka tū hei kāinga mo ngā mahi toi ā Tūhoe

  • Waikato/Te Waiariki

Ahakoa te kanukanu o tētahi o ngā whare tawhito rawa o Taneatua i tēnei wā, e kore e roa ka noho hei kainga ki ngā mahinga toi ataahua o te takiwā nei.

Nōreira i hoko a Laurence Hughes i te whare me te whakaaro kia whai wāhi nga ringatoi ki te whakaatu i a ratou mahi, waihoki, kia whakaawe pea i te hunga rangatahi.

Tūtūru e ai ki te ringa toi nō Ngāi Tūhoe, ki a Tame Iti, he maha rātou o te takiwā ka whai hua i tēnei whare.

Ko tā Tame Iti, “Kua roa mātou, ētahi o mātou kei te haukāinga nei e noho ana pēnei me a Carly Rangiaho mā, ki a Mihihia Davis, hē nui ngā wāhine, tae noa ki ngā hunga whakairo kōhatu, whakairo rākau, wēra momo āhuatanga katoa.”

Ko te wawata mā te whare toi e whakaaraara ano ra i te hapori o Taneatua, ā, ko te hiahia kia toro atu ki te hunga rāwaho ka haere tirotiro ki te whare hou o Ngāi Tuhoe, Te Urutaumatua.

Ko tā Tame, “He maha mātou kua whakaatu wā mātou mahi te nuinga o te wā kei te puta ki waho, koinei pea te wāhi nei o mātou ki te whakapiki atu ngā mahi whai rawa kei roto o Taneatua.”

Mārakerake te kitea he mahi nui tonu kei tua ki te whakatikatika me te whakapaipai i te wāhi nei, heoi, mārakerake ano rā te kitea te kaingākaunui ki te whakatinana i tēnei moemoea.

Kāti ko te hiahia kia whakatuwheratia te whare toi nei hei te tau hōu, i mua tonu i Te Hui Ahurei ā Tūhoe hei te aranga.