Kaupapa: Crime

He whakatūpato tā ngā pirihimana kia kaua e hoko tio whānako

By Te Kāea
  • Te Tai Tokerau

Neke atu i te rima rau kirokaramu te rahi o ngā tio i whānakohia e te nanakia i Whangaroa i Te Taitokerau. Heoi anō kua whakairingia e te tangata nāna ngā tio he pūtea moni hei whakarata i te tahae. Otirā, kei te whakatūpato te kaiahumoana i te tāngata kia kaua e hoko kia kaua e kai rānei i ēnei tio mai i ngā mākete nanakia.

Ka tuku te kaipāmu tio a Owen Robertson he moni whakapati.

Ki tā Owen Robertson ka whakatoke mai ngā nanakia rā i te pō mā ō rātou pōti kia tāhaetia āna mea.

E ai ki ngā pirihimana me mataara te iwi whānui kei pāngia rātou e ngā momo māuiuitanga, he mahi hara rānei i raro i te ture mēnā ka hoko rātou i ngā tio i whānakohia.

E mea ana a Robertson ko te aro noa iho o ēnei tāngata ko te pūtea.

E toru tekau ma waru te nui o ngā pēke me ngā tio kotahi rau mā waru te nui i whānako. E toru mano whā rau tāra te wāriu o ngā tio ki te mākete pango.

E kī mai a Robertson i te wā i tāhaetia ngā tio e kino ana te wai nā te nui o te wai māori me te paruparu e rere mai i ngā pamu, ā, kāore ngā nanakia rā e aro atu ki ēnei mea.

Ko te whakahau a ngā pirihimana ki te iwi whānui, whakapā atu ki a rātou mēnā ka hoatu ngā kaimoana nei ki a rātou.