Ngā kaupapa: Elections/Kōwhiri, Politics

He whakapiki ōhanga ki ngā takiwā te mahi a Iwirail

By Heeni Brown
  • Te Whanganui-ā-Tara

He whakakorikori, he whakaoreore i ngā ōhanga ā-rohe ki te hanga mahi te whai a te kaupapa here hōu a Te Pāti Māori, e kīa nei, ko Iwirail. 

E ai ki te Pāti, he kaupapa here tēnei ka hiki i nga rohe i te noho taratahi ki te taumata rangatira o te ōhanga. 

Ko tā Te Pāti Māori, he kotahi piriona tāra te pitomata, ā, he whitu mano rima rau ngā mahi ka tāea i raro i tēnei kaupapa-here.

Tā te Perehitini a Tukoroirangi Morgan, "Mā tētahi tūranga mahi tereina, ka hua ake he tūranga mahi kani rākau, mahi ahuwhenua, mahi hangahanga, mahi tūruhi aha atu, aha atu."

Ko te hiahia kia tīmata ki Te Tairāwhiti, ki te ara tereina atu i Ahuriri ki Tūranga ka hinga nei i te tau rua mano tekau mā rua i ngā uira nui i pā ki te takiwa o Wairoa.

Tā te kaitono mō Te Tairāwhiti, a Marama Fox, "Ka tirohia ngā raina ngoikore. E mōhio tonu ana mātou ko ērā raina tonu ngā raina i tango i raro i te ture."

Engari, me whai wāhi atu ki te toru rau rima tekau miriona tāra hei kōkiri me tētahi tukuhanga moni e kotahi rau miriona tāra ia tau.

"Tēnei takiwā o Te Tairāwhiti kei raro tonu ētahi e putu ai, kei raro i te pōharatanga kei ngā tōpito o taua takiwā. Heoi anō kei roto i ō rātou whakaaro, i ō rātou ringaringa ō rātou hiahia te whakatū mahi. Engari kāre e tāea te tuku i ō rātou rawa ki ngā wāhi tika, kia tuku ki te ao."

Heoi anō, e whakahē ana Te Uniana Utu Tāke i te kaupapa-here. Tā te Uniana, he tāhae moni tēnei i ngā kaupapa hangahanga pēnei anō i ngā hangahanga huarahi o Te Tairāwhiti.

Heoi anō kahore hoki a Nikki Searancke mō te whakaae.

Tā Searancke, "Ko ā mātou whakaaro kahore te kāwanatanga kia whakatikatika i tō mātou ara tereina. E hiahia ana e ngā pākihi o Tūranga ki tēnei, me te hiahia hoki tēnei a ngā kamupene taraka hoki."