He whakapāha tā Countdown ki tētahi kōhine Māori mō te whakaiti i a ia

updated Te Kāea, Wepiha Te Kanawa
  • Waikato/Te Waiariki

Ohorere ana ngā kiritaki o Countdown Dinsdale i Kirikiriroa ki te rongo i hawenetia, i whakamōrarohia hoki tētahi wahine Maori hapū e ngā kaimahi o Countdown.

I whāki atu a Rikki Cooper ki te niupepa o Waikato, i a ia e hoko kai ana i rongo ia mā runga i ngā reo irirangi, "Kia horo CCTV ki te ara tuatahi, tokorua ngā wāhine Māori."

Whai muri ake ka puta, "Ko te kaiārahi te wahine Māori e mau ana i te pēke ki tōnā taha."

E ai ki a Cooper i patua ia e te whakamā, ā, mōhio ana ia koia te Māori e kōrerohia ana.

Kua tuku whakapāha a Countdown ki te wahine me tōna whānau, heoi e ai ki ngā kiritaki ki konei ki Countdown Dinsdale, he mahi hē, maninohea tēnei nā te whare hokomaha.

I whakaputa a Countdown i tēnei pānui, e mea ana e noho matekiri, ohorere hoki ana rātou, ā, kua tuku whakapāha rātou ki te wahine me tōna whānau.

I te Rāmere i whakapā kanohi ki te kanohi tētahi kaikōrero nō Countdown ki a Cooper me tōna whānau.

E ai ki a Countdown i rongo a Rikki ki tō rātou whakamā.

He whakatewhatewha kei te haere i roto i te kamupene, ā, tē taea e rātou te whakaputa kōrero nā runga i ngā here o te ture.