Ngā kaupapa: Arts, Tainui

He whakaaturanga hei whakamānawa i ngā māreikura tokowhitu nō te waka o Tainui

Mānia Clarke
  • Tāmaki Makaurau
  • Waikato/Te Waiariki

Tokowhitu ngā māreikura nō te waka o Tainui e whakamānawatia ana e tētahi whakaaturanga e kīa nei He Toa! He Wahine.

He tuatahitanga te whakakitenga nei hei whakamaharatanga i ngā tau kotahi rau ono tekau e tū nei Te Kiingitanga, te kotahi rau rua tekau mā rima o Suffrage mō Ngā Wāhine me te tau hōu Māori o Matariki.

Hei tā kaiwhakarite, hei tā Ataahua Papa i ngā tau o mua ko te nuinga o ngā mahi pai i mahia e ngā tāne, engari kua wareware i a mātou,

“Ko ngā mahi tino kaha o ngā wāhine Māori o aua wā. I aua wā i whawhai rātou, kei konei mātou te hua o ā rātou whawhai,” i mea atu ia.

Ko tā Papa, e mōhiotia whānuitia ana e te iwi whānui o te motu nei i ngā mahi rongonui a Te Puea.

“Ōna mahi whakatū marae ki Tūrangawaewae, ngā whare o Mahinaarangi me Tūrongo.”

“Ngā mahi pāmu, ngā mahi tiaki tamariki, ngā mahi whakahē i te tuku ngā tangata o Tainui waka ki te pakanga o ao.”

Ko Piupiu Te Wherowhero te teina o Te Puea. Ko tana pāpā ko Te Wherowhero, te tama tuarua o Kiingi Tawhiao.

“Ehara ia i te wahine tino rongonui engari, he wahine kaha ia ki te mahi i aua wā i roto i te manaaki tangata, ki te whakatū whare, ki te whakatū marae, ki te tiaki a-wairua i ngā tāngata o Tainui waka.”

E ai ki a Papa ko Te Atairangi Kaahu te tino toa.

“Whā tekau tau ki runga i te torōna ki te whakararanga mai i ngā tangata katoa o te motu ki raro i te maru o Te Kiingitanga.”

E whakahōnore ana a Nanaia Mahuta mō āna mahi, i roto i te mahi tōrangapū.

“He mema o te kāhui ariki ia. Ko tana kuia ko Piupiu Te Wherowhero, koia te kuia o Te Kotahi Mahuta.”

Ko Rukumoana, Ko Parekawhia, ko Donna ngā ūpoko e toru ngā toihau e toru o ngā komiti whakahaere ā-iwi.

“Kei a rātou te mana ināianei, kei te whakahaere i ngā kaupapa nui kia piki ake a Waikato-Tainui  kia rewa ake ki runga.

E tū ana te whakaaturanga ki te Wharetoi o Ngā Tohu o Uenuku ki Māngere tae noa ki te Rāhoroi nei.